Тываның Орук-транспорт яамызының дыңнатканы-биле алырга, бо чылын «Чуртталганың инфраструктуразы» национал төлевилелдиң, «Көдээ девискээрлерниң комплекстиг хөгжүлдези» база «Тыва Республиканың транспорт системазының хөгжүлдези» күрүне программаларының боттандырылгазы-биле орук ажылдарын чорудар. Ниитизи-биле 156,62 километр орук участоктарының эде чаартылгазынче 44 хемчег планнаттынган. Ынаар ниитизи-биле 270 метр узун 2 көвүрүгнү база 156,35 километр узун 42 орук участоктары кирген.
Күрүне программазының күүселдези езугаар Кызылдың девискээринде 5 километр ажыг 8 орукту, а регионалдыг автооруктарда — 150 километрден узун 17 участокту, ооң иштинде көдээ девискээрлерде 3 километр оруктарны септээри планнаттынган. Ол ышкаш 7,5 километр хире шөйлү берген кудумчуларже чырыкты киирери көрдүнген.
2025 чылда Хадың биле Тээли суурларже кирер оруктарны, «Бояровка – Доора-Хем» база «Мугур-Аксы – Кызыл-Хая» автоорук участоктарын, «Бүрен-Ак- сы – Элегес-Аксы – Кунгуртуг» автооруктарының Сизим суурга чедир участокту, Хадың биле Дус-Хөл хөлдерже кирер оруктарны чогуур байдалче киирерин планнаан.
«Чуртталганың инфраструктуразы» национал төлевилел-биле ажылдарны кылыр. Энергетиктер, Чүргүй-оол, Колхозная кудумчуларга база Вавилин ээтпээ микрорайонда Кара-Хаак суурже чедер орукту бир дугаарында кылып эгелээр. «Восток» база «ДСТ» КХН – тудуг организациялары 2025 чылдың апрельдиң баштайгы он хонуунда белеткел ажылдарынче кирген.
Айыттынган орук участоктарында амгы үеде орук ажылдарының элээн чадалары кылдынган: асфальтының кырыкы каъдын адырып, сай-довуракты төккен, Энергетиктер кудумчузунда орукту асфальтылап турар. «Чуртталганың инфраструктуразы» национал төлевилел-биле септелге ажылдарында 40 хире ажылчын, 25 санныг тускай техника хаара туттунган.
Чурттакчы чоннуң дилээ болгаш Тыва Республиканың Баштыңы Владислав Ховалыгның аңгы даалгазы езугаар септээр объектилерни шилип алганын Тываның орук-транспорт сайыды Шораан Чыргал-оол демдеглээн. Тудуг организациялары участоктарга кылыр ажылдарының графигин, тодаргай хуусаазын тургузуп, дугурушкаш, аттарны салган. Оон аңгыда, объектилерде ажылдың чорудуун контрольдаар кураторларны база томуйлаан.
“Хандагайты” эрттирилге пунктузун эде чаарткан тудуг-эптээшкин ажылдарын доозуп, ону хөй талалыг чурумга ажылдадырынга, Баян-Кол суурже Улуг-Хемни кежир көвүрүг тударының төлевилел-санаашкын документилерин ажылдап кылырынга, ол ышкаш Кызылдың аэропорт комплекизин сайзырадырынга, автомобиль транспортунуң пассажирлер аргыштырылгазынга контрольду хандырары – бо чылда яамының мурнады боттандырар угланыышкыннарының аразында.
Орук-транспорт яамызының медээзинден.
Чурукту интернеттен хоолгалаан.
“Шын” №17 2025 чылдың май 8
