Тывада «Россияның суу» Бүгү-российжи акция доозулган. Киржикчилер 252 километр узун эриктерни боктан арыглап-аштаан. 2025 чылдың тос айында республикага 88 субботник эрткен, аңаа 7 муң ажыг кижи киришкен. Идепкейжилерниң күжү-биле 260 хире куб метр бокту чыып, хемнерниң болгаш хөлдерниң эриктерин арыглаан.
Чурттуң суг объектилериниң арыг-силиин хандырар сорулгалыг «Экология» национал төлевилелдиң «Онзагай суг объектилерин кадагалаары» федералдыг төлевилелиниң акциязы-биле эрик зоналарынга акцияны организастаан. Акцияның чүгле киржикчилериниң саны көвүдээн эвес, а янзы-бүрү организацияларның болгаш хөй-ниити шимчээшкиннериниң талазындан экология айтырыгларынга сонуургал чылдың-на өзүп турарын Тываның Арга-арыг болгаш бойдус ажыл-агый яамызы демдеглээн.
Бо чылын акцияга улуг-даа, бичии-даа кижилер, ооң иштинде уруглар садының кижизиттирикчилери идепкейлиг киришкеннер. Активчилерниң санында ажы-төлдүг аныяк өг-бүлелер, школачылар, студентилер хөй. Бо чүүл долгандыр экология болгаш суг объектилериниң арыын кадагалаары шупту салгалдарның чугула айтырыы апарганының херечизи. Мындыг акцияларга киржилге кижилерге республиканың суг курлавырларынга камныг хамаарылганы кижизидип, долгандыр хүрээлел камгалалының чугулазын медерээрин хевирлээр.
Тываның арга-арыг болгаш бойдус ажыл-агыйының сайыды Григорий Ондар субботниктерниң киржикчилеринге четтиргенин илереткеш, оларның үлүг-хуузу үнелиг дээрзин демдеглээн. «Төрээн черивисти чүгле кады демнежип тургаш, бичии-даа болза экижидип, хемнер болгаш хөлдеривистиң эриктерин арыглап шыдаар бис» — деп, сайыт демдеглээн.
А. МОНГУШ.
Чуруктарны ТР-ниң Чазааның парлалга албанындан алган.
“Шын” №43 2025 чылдың ноябрь 6
