Тываның күрүне университединге билиг бедиткениниң дугайында дипломнар тыпсыр байырлыг ёзулал болуп эрткен. ТывКУ-нуң болгаш Новосибирскиниң күрүнениң техниктиг университединиң кады тывысканы дипломнарны 200 доозукчу алган.
2023–2024 өөредилге чылында интернет четкизин дамчыштыр кады ажылдажыр дугайында дугуржулганы кылганын демдеглээр апаар. Доозукчулар ырактан өөренген түңнелинде, информастыг технологияларже угланыышкынныг дипломнарны алганнар.
Байырлыг ёзулалды Тываның күрүне университединиң ректору Ольга Хомушку ажыткан. Ол доозукчуларга байырын чедирип, мергежилиниң аайы-биле сорулгаларын боттандырарынга чедиишкиннерни болгаш оларны чедип алырын күзээн.
Студентилер боттарының ээлчээнде өөредилгениң шынарын бедик деп үнелевишаан, берген билиглери болгаш деткимчези дээш өөрүп четтиргенин илереткеннер. Администрацияның болгаш башкыларның чылыг-чымчак хамаарылгазын, хүндүткелин демдеглээн. Тургустунарынга болгаш сайзыраарынга дузалашкан бүгү-ле кижилерге база четтиргенин илереткен.
Чылдың-на 1000 ажыг студент Тываның күрүне университединден аңгы-аңгы угланыышкыннар болгаш мергежилдер-биле доозуп үнүп турар. Оларның 80–100 хирези “кызыл” дипломнуг болур.
Тываның күрүне университеди Чаңгыс аай күрүне шылгалдаларының түңнелдери-биле абитуриентилерни июль 25-ке чедир хүлээп турар.
Бистиң корр.
Чуруктарны ТывКУ-нуң парлалга албанындан алган.
"Шын" №54 2024 чылдың июль 20
