Апрель 29-та Элегес-Аксы суурнуң көдээ Культура бажыңынга Кызыл кожууннуң сумулар аразынга «Стартинейджер: улам чараш танцылаар – 2023» мөөрей бедик деңнелге болуп эрткен. Ону «Стартинейджер» танцы-самның аажок сайзырап эгелээн үези 1995–2011 чылдарда школачыларны болгаш аныяктарны танцы-самче хаара тудуп, Кызыл кожуунга болгаш республикага нептередип чораан салым-чаяанныг хореограф башкы Альберт Бурбужуктуң чырык адынга тураскаадып эрттирген.
Мөөрейниң эгезинде Альберт Бурбужуктуң өөреникчилериниң бирээзи Сайдаш Монгушка баштаткан «ХХ вектиң легендазы» бөлүктүң кежигүннери башкызын чылыг-чымчаа-биле сагынганнар. «Бистиң башкывыс Альберт Александрович бисти чүгле танцылап өөредип эвес, а эп-найыралга, быжыг демниг болурунга кижизидип чораан.
Башкывыстың удуртулгазы-биле танцылап өөренир дээш, дискектеривис дешти бергенин безин эскербес, ол хире танцы-самга бердинген чордувус» — деп, Урана Севээн чугаалаан. Апрель 29 башкызының төрүттүнген хүнү, ынчангаш ооң авазы Галина Май-ооловнага кызыл розаларны сөңнеп тудусканнар.
Кайгамчыктыг салым-чаяанныг хореограф башкының чогаадыкчы ажылы аныяктарга болгаш өзүп олурар бичии салгалга боттарының кыптыгып чоруур салым-чаяанын боттандырып сайзырадырынга үлегер-чижек кылдыр Альберт Бурбужуктуң дуңмазы болгаш өөреникчизи Сайдаш Монгуш мөөрейни организастап эрттиргени онзагай болду.
«Стартинейджерниң” Тывага эң баштайгы «Камон Брейкет» бөлүүнүң удуртукчузу Владимир Ооржак, солизи Саян Монгуш база танцы-самчылары аалдап келгеннер.
Акызы Альберт Бурбужуктуң: «Дириг чорзумза, төрүттүнген хүнүмнү, апрель 29-ту, кады самнап чораан эштеримни болгаш өөреникчилеримни чалап алгаш, концерт-мөөрей кылдыр эрттирер мен» деп, күзеп чораанын Сайдаш Викторович сактып чугаалаан.
Альберт Бурбужук кайгамчык салым-чаяанныг танцы-самчы чораанындан аңгыда, чурукчу, шүлүкчү. Ооң шүлүктерин болгаш чуруктарын «Сылдысчыгаш» солунга, «Алдын-Кушкаш» сеткүүлге парлап үндүрүп турган. Хореограф башкының ажылдап чорааны Шамбалыг болгаш Элегес-Аксы школаларның танцы-самчы өөреникчилери «Стартинейджер» мөөрейлерге беш удаа Гран-при шаңналынга төлептиг болуп, башкызының ажылынга бердингенин, тиилелгеже чүткүлүн көргүскеннер.
Хореограф башкы Альберт Бурбужуктуң чырык адынга тураскааткан, 2023 чылдың апрель 29-та эрткен «Стартинейджер улам чараш танцылаар – 2023» мөөрейге хоорай чергелиг Каа-Хем суурнуң, Кызыл кожууннуң Кур-Чер, Шамбалыг, Ээрбек, Черби, Кара-Хаак суурларның танцы бөлүктери киришкен.
Мөөрейниң 12–20 харлыг киржикчилериниң аразынга Гран-при шаңналды хоорай чергелиг Каа-Хем суурда уругларның уран чүүл школазының «Сувениры» ансамбль (удуртукчузу Чечена Хомушку) чаалап алган. Мөөрейниң 20-ден улуг харлыг киржикчилериниң аразынга Гран-при шаңналды Элегес-Аксы ортумак школазының “Фурор” танцы бөлүү (удуртукчузу Долаана Ооржак) ойнап алган. Мөөрейниң лауреаттары болгаш дипломантылары болган танцы бөлүктеринге база шаңналдарны тывыскан.
Ат-сураглыг хореограф башкы чораан Альберт Бурбужуктуң чырык адынга тураскааткан мөөрейни организастап эрттиреринге ооң чоок төрелдери, эш-өөрү, өөреникчилери деткикчилээннер.
/ Галина БУРБУЖУК.
"Шын" №33 2023 чылдың май 6
