«2023–2028 чылдарда күрүне хамааты албанын хөгжүдери» күрүне программазының хемчээ-биле Тываның тергиин күрүне албан-хаакчызы ат дээш мөөрейни бир дугаар эрттирген. Күүсекчи болгаш күрүне эрге-чагырга органнарында ажылдап турар 32 албан-хаакчы мөөрейге киришкен. Регионнуң Баштыңы Владислав Ховалыг мөөрейниң тиилекчилеринге байыр чедирген.
Күрүне хамааты албанының ат-алдарын бедидип, республиканың күрүне эрге-чагырга органнарының ажыл-чорудулгазының дээштиин хандырарынга улуг үлүг-хуузун киирген болгаш профессионал албан ажыл-чорудулгазында бедик үре-түңнелдерни чедип алган күрүне хамааты албан-хаакчыларын илередип база деткиир дээш, мөөрейни организастаан.
Мөөрейниң үшкү чадазында конкурс комиссиязы шилилде турну эрткен 16 киржикчиниң «Бистиң республиканың (күрүнениң) хөгжүлдезин кандыг арга-биле экижидип болур мен?» деп темага санал-оналын дыңнаан. Мөөрей киржикчилери албан-хүлээлгезиниң аайы-биле, аңгы адырның социал-экономиктиг хөгжүлдезиниң көргүзүглерин экижидеринче угланган илеткелдерни кылган.
Тыва Республиканың Дээди Хуралының (парламент) күрүне албан-хаакчызы Аржаан Куулар бүгү-ле шылгалдаларны чедиишкинниг эрткеш, хүндүлүг бирги черни ээлеп, «2023 чылдың тулган күрүне хамааты албан-хаакчызы» атка төлептиг болган. Тыва Республиканың Дээди Хуралында күрүне албанында ажылдап турар Айяш Конгар ийиги черни ээлээн. ТР-ниң Соңгулда комиссиязының албан-хаакчызы Дозураш Шулуу үшкү черге төлептиг болган.
Владислав Ховалыг тиилекчилерге дипломнарны тыпсып, республиканың чаагай чоруу дээш ажыл-албанынга чедиишкиннерни күзээн.
ТР-ниң Чазааның парлалга албаны.
«Шын» №87 2023 чылдың ноябрь 15
