Июнь 20-де «Алдын-Булак» этнокультурлуг комплекске тыва хамнарның I “Дүңгүр” фестивалының байырлыг ажыдыышкыны болуп эрткен. “Дүңгүр” фестивалын этнограф Монгуш Кенин-Лопсанга тураскаадып эрттирип турар.
Фестивальдың ажыдыышкынынга 17 региондан база Казахстан болгаш Моолдан 300 ажыг хамнар киришкен. Байырлыг ажыдыышкынны 8 аңгы хамнар ниитилелдериниң парады-биле эгелээн. Парадка Дээди хам Кара-оол Допчун-оолдуң удуртулгазы-биле “Дүңгүр”, “Тос Дээр”, Чеди хамнар салгалдары”, “Тэнгри-Үгер” , “Тос-карак”, “Мөңге Дээр”, “Бөрү-Ээрен” болгаш “Чеди-Хаан” хамнар ниитилелдериниң кежигүннери киришкен.
Үш хонуктуң дургузунда езу-чаңчылдарлыг, өөредилгелиг көргүзүглер, мастер-класстар, ус-шеверлерниң ярмарка-делгелгези база хамнар-биле ужуражылгалар болур.
Фестивальды күзелдиг кижи көрүп, сонуургап болур дээрзин Республиканың националдар херектериниң талазы-биле агентилели дыңнадып турар. “Алдын-Булакта” хамнар-биле ужуражырынга таарымчалыг майгыннар хоорайжыгажын тургускан.
Тываның девискээринге иштики туризмни сайзырадыр база республиканың онзагай чараш черлерин болгаш езу-чаңчылдарын нептередир сорулга-биле бо фестивальды эрттирип турар.
Бистиң корр.
