«Автопоезд» Бүгү-российжи акция-биле «Бүгү чүүлдү тиилелгеже!» болгаш «Тыва – фронтуга» деп бижиктиг автомашиналар март 31-ниң даң бажында Тывадан үнүпкен. Тывадан үнген 34 автомашина Абакандан тура демир-орук-биле Ростов Донда хоорайга чедер. Оларның Абакан хоорайга чедер кывар-чаар чүүлүн «ГААО-№2» АН-ниң чиңгине директору Дмитрий Черевко деткикчилээн.
«Улусчу фронтунуң дилээ-биле «Автопоездини» организастажып, 400 литр кывар-чаар чүүлдү саттывыс. ТШО эгелээрге-ле, материалдыг дузаны удаа-дараа чедирип турдувус. Тиилелгеге чедир шыдаар шаавыс-биле дузавысты кадар бис» – деп, Дмитрий Черевко чугаалады.
34 автомашинаны аңгы-аңгы организациялар дузаламчыга чыып белеткээн. Оларның аразында хууда сайгарлыкчылар, күрүне албан черлери база бар. Олар берген автомашиназының багын долдур кывар-чаар чүүлдү кудуп белеткээн. «ГААО-№2» АН хөй кезиинде эзирик автомашина башкарган чолаачылардан хавырган техниканың кывар-чаар чүүлүн саткан.
Улусчу фронтунуң Тыва Республикада салбыры ТР-ниң Чазааның деткимчези-биле «Автопоезд» акциязын «Бүгү чүүлдү тиилелгеже!» деп кыйгырыгның адаа-биле боттандырган дээрзин сагындыраал.
Дайынчы хөделиишкиннер девискээринче аъттаныр автомашиналарны 55-ки гвардейжи мото-адыгжы бригаданың солдаттары үрер хөгжүм оркестриниң үделгези-биле байырлыг езу-биле чыскаалга үдээн.
55-ки гвардейжи бригаданың командириниң оралакчызы подполковник Александр Кольмягин ТР-ниң Чазаанга, Улусчу фронтунуң Тывада салбырынга болгаш тускай шериг операциязының киржикчилеринге төнчү чокка материалдыг болгаш моральдыг дуза кадып турар тыва чонга өөрүп четтиргенин илеретти.
ТР-ниң Баштыңы Владислав Ховалыг байырлыг чыскаалга келгеш, «Автопоезд» Бүгү-российжи акцияга Тыва база идепкейлиг киржип турарын чугаалаан.
— Ада-чурт камгалакчызының чылынга болгаш Улуг Тиилелгениң 80 чыл болган оюнга тураскаадып, Тываның чурттакчы чону демниг чоруун көргүзүп, ок-чепсектиг тура халып келген нацистерге удур туржуп турар тыва дайынчыларывыска бо автомашиналарны чорудуп тур бис. Транспорт берген албан черлеринге болгаш техниканы септээр талазы-биле ажылдарны кылып чоруткан деткикчилерге өөрүп четтиргенимни илереттим.
Тыва чоннуң бо удаада чорудуп турары транспорт дузазын 1945 чылдың Улуг Тиилелгезинге тураскааттывыс. Май 9-та автомашиналар чедер черинге четкен турар. Төрээн черивис дээш, Тиилелге бистии болур! Ак орукту күзедим! – деп, Владислав Ховалыг кыйгырыг болгаш йөрээл сөстер-биле чугаазын доосту.
Дириг хөгжүмнүң үделгези-биле «Автопоезд» халдып үнүпкен. ТР-ниң Дээди Хуралының депутады база Улусчу фронтунуң төлээзи Эрес Хуурактың медеглээни-биле, «Автопоезд» орукка 2–3 неделя чоруур. Удавас апрель эгезинде 2025 чылдың 2-ги «Автопоездизи» аъттаныр. Дараазында «Автопоезд»-биле каш автомобильди, кымнар чорударын дараазында үндүрүлгелерден номчуур силер.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Тыва эки турачылар кудумчузу, 3 («Норзин» садыг төвү) азы Цеченлинг хүрээзи, бир болза Ленин кудумчузунуң 5 дугаар бажыңында (ТывКУ) «Шупту кады бис» шимчээшкинниң штавында. Харылзажыр дугаары: 8 (39422) 2-10-50.
Айдың ОНДАР.
Буян ООРЖАКТЫҢ тырттырган чуруктары.
«Шын» №12 2025 чылдың апрель 3