Тываның 3845 чурттакчызы 2023 чылда социал деткимчезин алган. Республика Чазааның неделяның Аппарат хуралында социал керээ-биле эвээш орулгалыг хамаатыларны деткээн программа күүселдезиниң түңнелдерин чугаалашкан.
2023 чылда ол сорулгага 634,5 сая рубльди тускайлаан деп программа күүселдези дээш харыысалгалыг ТР-ниң Күш-ажыл яамызы илеткээн. Деткимчениң дөрт угланыышкынындан ооң мурнунда чылдарда ышкаш, ажылдаар чер тыварынга дуза эң хереглелдиг болган.
1309 кижи ону ажыглаан, Тывада күш-ажыл төлевириниң кудуку хемчээли хире пособие – бир айда 16242 рубльди 9 ай иштинде төлээн. Бир эвес керээде эде өөредири көрдүнген болза, чарыгдалдарын төлээри-биле кады 30 муң рубль чедир акшаны төлээн.
Бодун ажыл-биле хандыртынар хуу сайгарлыкчы азы бодунуң херээн ажыдып алыксааннар-биле керээ чарары – ийиги нептереңгей хевир. 2023 чылда 1037 кижи ындыг керээлерни чарган. Билдириишкин киирикчизи ажылга тургустунар керээге деңнээрге, бизнести организастаарынга 350 муң рубль түңнүг акшаны алыры, улуг деткимче.
Тывага бодунуң херээн ажыдар социал керээ программазын дөрт чылда күүсеткени эки түңнелдерни бергенин демдеглезе чогуур. 2020–2022 чылдарда бодун ажыл-биле хандыртынарынга база сайгарлыкчы ажыл-иш ажыдарынга керээ чарган 2473 кижиден чүгле 66 кижи ажылын хаап, үндүрүг учедундан үнген. Арткан 2407 кижи ажылын уламчылавышаан.
Республикада ол хире санныг кижи хууда дузалал ажыл-агыйын чорударынга деткимчени алган. 2023 чылда Тываның 959 чурттакчызы мал-маган, үрезин аймаа болгаш өске-даа чүүлдер садып алырынга 200 рубль түңнүг акшаларны алган. Керээниң ачызында дыка хөй кижилер аъш-чем продуктулары-биле боттарын хандырып шыдаптар апарган.
Социал керээниң амыдыралдың берге байдалын шыдап эртеринге дуза көргүзер угланыышкынныг дөрткү хевири 540 кижини хаара туткан. Керээ чарган кижи 2-ден 6 ай чедир хуусаада 50-ден 70 муң рубль чедир деткимчени алыр. 2023 чылда Тывада программа киржикчилеринге 31 ажыг сая рубльди төлээн.
Бистиң корр.
Чурукту интернеттен алган.
“Шын” №48 2024 чылдың июнь 29
