Найысылал Кызылга “Чаңгыс демниг Россия” партиязының Тывада регионалдыг салбырының 40 дугаар юбилейлиг конференциязы болуп эрткен. Аңаа бо чылын сентябрь 8-тиң хүнүнде болур Дээди Хуралдың депутаттарының соңгулдазынче кандидаттарны тодарадып, партияның өске-даа айтырыгларын сайгарып чугаалашкан.
Партияның уставы ёзугаар, 55 төлээ аразындан 19 салбырдан 21 төлээни конференция үезинде шилээн. Конференцияның ажылынга 38 кежигүн киришкен. Оларның 19-у регионалдыг политиктиг чөвүлелче кирип турар.
Чажыт соңгулданың түңнелинде “Чаңгыс демниг Россия” партиязының 80 кордакчызындан депутаттар соңгулдазынга 32 кижи киржир. Оларның аразында өөредилге, кадык камгалалы, спорт, культура дээш оон-даа өске аңгы-аңгы адырлардан кордакчылар кирип турар. Тыва Республиканың Дээди Хуралының ам болур соңгулдазы регионга кончуг чугула политиктиг болуушкун болур.
“Эң-не чугула чүүл – тускай шериг операциязының 8 киржикчизин база идип үндүрдүвүс. Президентиниң “Маадырлар үези” деп билиг бээр модульдуг сорулгазын күүседип турарывыс база онзагай черни ээлеп турар”– деп, Чаңгыс демниг Россия партиязының күүсекчи комитединиң удуртукчузу Айдыс Ооржак чугаалаан.
Тускай шериг операциязының киржикчизи Айдыс Куулар баш удур соңгулдаларга кандидат кылдыр бодун шенээр деп шиитпирлээн. Бодунуң ээлчээнде партия ону идип үндүрер шиитпирни хүлээп алган. “Тускай шериг операциязынга киржип тургаш, "Чаңгыс демниг Россия" партиязының шериглерге канчаар-даа аажок улуг дузаны чедирип турарын көрдүм. Ол дээрге үргүлчүлелдиг гуманитарлыг дуза, шериглерни деткиир хоойлу чогаадыр эгелээшкиннер. Ук партия оон ыңай Россия Федерациязының Президентизиниң ылаңгыя шериг албанныг кижилерни удуртукчу албан хүлээлгелерже деткиир дугайында эгелээшкинин бүгү талазы-биле деткээн. "Мени Дээди Хуралдың депутаттарының аразынче кандидат кылдыр киирген болганда, бүгү күжүм мөөңнеп тургаш, партияның эгелээшкинин шынзыдып, аңаа дүгжүр дээш, кызыдар мен” – деп, Айдыс Куулар чугаалаан.
Депутаттарже кандидаттарны шилээн соонда, “Чаңгыс демниг Россия” партиязының соңгукчуларының күзелдеринге үндезилеттинген программазын ажылдап кылыр. Партия иштинге соңгулда үезинде соңгукчу бүрүзү бодунуң саналдарын чугаалаан дээрзин Тываның Дээди Хуралының Даргазы Каң-оол Даваа демдеглээн.
“Ооң мурнунда ТР-ниң Дээди Хуралының соңгулдаларынга бадылаан программа хөй кезиинде боттанган деп чугаалап болур. Бо удаа база бистиң соңгукчуларывыс боттарының чагыгларын, дилеглерин, күзээшкиннерин киирген. Аңаа үндезилээн программаны чыып кылгаш, хүлээп алыр бис” – деп, Каң-оол Даваа чугаалаан.
Оон аңгыда, партияже чаа кирип турар кежигүннерге партияның билеттерин, эки түңнелдерлиг ажылдааннарга шаңнал-макталдарны тывыскан. Оларның бирээзи Аян Ширижик ооң мурнунда-ла партияның талалакчызы турганын демдеглээн: “Чаңгыс демниг Россия партиязы-биле үргүлчү кады ажылдап, янзы-бүрү хемчеглерни эрттирип, ооң иштинде партияның деткимчези-биле тыва хөөмейни Тыва Республиканың этнокультурлуг өнчүзү кылдыр хүлээп алганының дугайында хоойлу база хүлээп алдынган. Гастрольдар-даа үезинде эң-не күштүг партия деп көргеш, ооң кежигүнү кылдыр кирип турарым бо”.
Чыжыргана СААЯ.
Буян Ооржактың тырттырган чуруктары.
“Шын” №50 2024 чылдың июль 6
