Партияның тыва салбырының секретары болгаш Тываның Баштыңы Владислав Ховалыг байырны чедирген.
Партия үре-түңнелдиг социал-политиктиг байдалды тургузуп, регионнуң моон соңгааргы хөгжүлдезинге үндезинни тургузуп турарын ол онзалап демдеглээн. «Эртип турар чылда чуртта болгаш республикада чугула политиктиг болуушкуннар болган: 2024 чылдың март 17-де Россия Федерациязының Президентизин соңгуп алган бис. Республикада соңгукчуларның 95,59 хуузу соңгулдаларга киржип, Владимир Владимирович Путин дээш 95,37 хуу үннү бергеннер, а Тываның чамдык кожууннары 99–100 хуу бадылаан. Ол көргүзүглер чүгле бистиң республикада эвес, а бүгү чуртта эң хөй. Бүгү Россияда эң бажында үштүң санынче кирген бис. Хөй националдыг Тыва хамаарышпас, бот-догуннаан база күчү-күштүг Россия дээш бир дем-биле бүзүрелдиг бадылаан. Моон-даа соңгаар боттарывыстың амыр-тайбыңывысты, үнелиг чүүлдеривисти, амыдырал-чуртталгавыстың онзагайын, төрээн чуртувустуң чаңгыс демин эп-найыралдыг кадагалаарывыска, бүзүрээр мен» – деп, Тываның Баштыңы чугаалаан.
Чылдың кол болуушкуну – Тывага Россияның Президентизи келгеш, бурунгаар өскерлиишкиннерге эки демдекти салып, социал-экономиктиг хөгжүлдени шапкынчыдар элээн каш даалгаларны бергенин сагындырган.
В. Ховалыг бодунуң чугаазын доозуп тура, 2025 чылда болур политиктиг болуушкуннарны, ооң иштинде Президентиниң Айыткалын айыткан. «Ол Россияның политиктиг, экономиктиг, технологтуг, шериг болгаш төөгүлүг бот-догуннаашкынынга үндезилеттинген 6 чылдың эргилдезин ырадыр көрген келир үениң овур-хевирин айыткан чурттуң хөгжүлде программазы апаарынга бүзүрээр мен. Чурттуң болгаш регионнарның хөгжүлдезинге хамаарышкан кандыг-даа планнар болгаш ажыл-херектер Президентиниң кезээде онза кичээнгейинде болгаш үнелелинде, акша-хөреңгиниң хемчээли эвес, а чоннуң хандырылгазы болгаш чаагай чоруу кол» – деп, Тываның Баштыңы түңнээн.
Конференцияга «Улусчу программаларга» даянган үш шөл ажылдаан: херээженнер шимчээшкини, ТШО-нуң чугула айтырыглары дээш оон-даа өске.
Конференция үезинде партияның чаа кежигүннеринге партийжи билеттерни тывыскан. «Маадырга чылыг» акцияга идепкейлиг киришкени дээш Кызылдың, Бии-Хемниң болгаш Сүт-Хөлдүң салбырларынга регионалдыг салбырның өөрүп четтириишкиннерин тывыскан. Ол ышкаш Регионалдыг политиктиг чөвүлелди чаартыр айтырыгларны база чугаалашкан.
ТР-ниң Чазааның парлалга албаны.
“Шын” №91 2024 чылдың ноябрь 27
