Күрүнеден деткимче алырынга дөртен ийи төлевилелди Тыва Республиканың Күш-ажыл болгаш социал политика яамызынга болуп эрткен республика комиссиязының хуралынга сайгарып көрген. Ол төлевилелдерниң аразындан 37 төлевилел хууда бизнес ажыл-херээн ажыдып алырынга хамаарышкан болган.
Оларның аразында чараштаныр салонну, бичии уругларның ойнаар залын ажыдар, автомашиналар септээринге ачы-дуза чедирер, эъттен аъш-чем кылыр идеяларлыг төлевилелдер бар. 5 төлевилел – хууда дузалал ажыл-агыйын хөгжүдери. Төлевилелдерни сайгарып көрген соонда, ийи бизнес-планны чедир ажылдап кылырын саналдаан.
Төлевилелдерин республика комиссиязынга кииргеннерниң бирээзи Биче-кыс Ооржак. Ооң эртем-билии дефектолог, чугаалаары багай уругларга ачы-дузаны чедирип турар. Дефектология талазы-биле дээди эртемниг, арга-дуржулгалыг болгаш, чугаалап өөренири берге уругларга дузалаар ажыл-херээн улам хөгжүдерин ол планнаан. Дефектолог специалистер республикада ам-даа чедишпес болганындан ооң ачы-дузазы ада-иелерге болгаш оларның ажы-төлүнге дыка херек. Чонга чугула херек хууда ажыл-херээн улам сайзырадыр арга төлевилелдиң авторунда бар.
Республика комиссиязынга төлевилелдерин киирериниң мурнунда оларның авторлары баштай муниципалитеттер деңнелинге шилилгени эртип турарын Күш-ажыл болгаш социал политика яамызының төлээлери дыңнатканнар. Күрүне деткимчезин алыр дээн кижилерге эптиг болзун дээш, оларның киирген төлевилелдерин видеохарылзаа хевиринге база республика комиссиязының кежигүннери сайгарып көрүп турар.
Орулгалары эвээш, 350 муң рубль түңнүг акша дузазын күрүнеден алыксаан хамаатылар боттарының ажыл-херээн эгелеп, сайзырадып алыры-биле төлевилелдерни кожууннарда чонну ажылга хаара тудар төптерге киирип болур.
Чурукту болгаш медээни Чонну ажылга хаара тудар төптен алган.
“Шын” №6 2025 чылдың февраль 20
