Тускай шериг операциязының айтырыгларының талазы-биле Тываның Баштыңының бүрүн эргелиг төлээзи Тимур Куулар ажыл-албан аайы-биле сургакчылап чоруткаш, тыва дайынчылар-биле ужуражыр. Ооң бо удаада Донда-Ростов хоорайга чеде бергеш бир дугаар баар чери – мөчээн дайынчыларны хүлээп, танып тодарадыр база үдээр ажылдыг 552 дугаарлыг шериг кезээ болган.
Тимур Куулар четкен дораан, Тываның Баштыңының даалгазы-биле Мурнуу шериг округунуң эмчи-криминалистика төвүнүң Ростовта салбырынче май эгезинде ажылдап чоруткан ТР-ниң суд-эмчи экспертиза бюрозунуң начальниги Херел Доржу баштаан специалистерге ужурашкан.
Мооң мурнунда Владислав Ховалыг ТШО-да тыва киржикчилерниң төрелдери-биле боду ужурашкан соонда, Ростов хоорайда коллегаларынга дөрт ай иштинде аңаа барып дузалажыр кылдыр сес суд-медэксперт эмчилеринден тургустунган бөлүктү чорудар деп дугурушканын сагындыраал. Элээн каш мөчээн тыва оолдарның ат-сывы бистиң эксперттерниң ажылы-биле тодараттынган, ам шериг истелге ажылдары чоруп турар.
Тимур Куулар читкен оолдарының салым-чолунуң дугайында кандыг-даа медээни оон билип алыр дээн идегел-биле Мурнуу шериг округунда чеде берген Тывадан шериглерниң ада-иелери база ужурашкан. Тимур Кууларның деткимчезинде, 55 дугаарлыг шериг кезээниң удуртукчузу Марат Мурадасилов сураа читкен дайынчыларның төрелдери-биле боду ужурашкан.
2024 чылдың май эгезинде, Тываның Баштыңы Владислав Ховалыг ТШО айтырыгларының талазы-биле республика блогунуң ажылын күштелдирер сорулга-биле, кызыгаар чоогу база чаа девискээрлерге ис чок читкен шериг албанныгларга болгаш оларның чоок кижилеринге деткимче көргүзер ажылдыг Тываның Чаңгыс аай дүүштүрүлге төвүн тургускан. Ол угланыышкында ажылды «Идегел» АКэН удуртукчузу, «Ада-чурт камгалакчылары» фондунуң Тывада салбырының координатору Мира Балчый удуртуп-баштап эгелээн.
ТР-ниң Чазааның парлалга албанының медээзи.
«Шын» №38 2024 чылдың май 25
![](https://sun4-20.userapi.com/impg/dtY4hJe3uQgXktBXxMQfWC0rbbdQ1dGLzgm48w/DDYsAa8v3ls.jpg?size=807x605&quality=95&sign=737d2784375afecd34c849befac3b3fa&c_uniq_tag=Mdec8L8TsVUwfmiDu5mI_T8688aMlBKExEvUyPzaG4s&type=album)
![](https://sun4-21.userapi.com/impg/KXUMmKDWg1us1DYSgflyLiLnOUm3gUGFMtLQWg/Kqqkf_1KdUs.jpg?size=807x605&quality=95&sign=712618c6d54f062bf76feb0850af23fc&c_uniq_tag=noRIlEG3AWy2fbEMUVw1H9syUJHpAjQx4xKRXOaXiG0&type=album)
![](https://sun4-18.userapi.com/impg/oIYGBqAak364CW4AZuISbs3Ea8N_Z_Y8SZNZZw/2Ly7Xi1tLt8.jpg?size=807x605&quality=95&sign=0db8bb2594af6a5a00dc622323fc35a7&c_uniq_tag=JH6memv8aD_BzEq3LQymWaNQphsIUilOI5oVWhVY0bg&type=album)
![](https://sun4-18.userapi.com/impg/xMhWUC38uzhBMk7r_HRDqqbtw5PkwOAnNTQeLg/OwAHUioVatM.jpg?size=807x605&quality=95&sign=5eb290e3464f7aeccd690b8aeb46af75&c_uniq_tag=P_LjTDvu-r2dwi3oBoLozUe9Dq-yQKjcfXfcTrcnp2I&type=album)