Тываның Баштыңы «Чаңгыс демниг Россияның» 23-кү съездизинге киришкен. Владислав Ховалыг социал четкилерде бодунуң хууда арынында Россияның Президентизиниң социал чөптүг чорук болгаш дең харыысалгалыг чорук чурттуң чонунуң чаңгыс деми дээрзин демдеглээн.
Чөптүг чорук дээрге-ле бүзүрээни эрге-чагырганы соңгуп турар чоннуң чаагай чоруу дээш, оларның бүзүрелин шынзыдары дээрзин республика Баштыңы демдеглээн.
«Ол дээрге хамыктың мурнунда чоннуң амыдыралының шынарын бедидери, өг-бүлелерни деткиири болгаш чаагай чаңчылдарывысты кадагалап арттырары-дыр. Ол даалгаларны хүлээнгеш, ажылдап кирипкен бис. Чурттаар оран-саваларның тудуун, оруктар септелгезин, чаа ажылчын олуттарны тургузарын ам-даа уламчылаар бис» – деп, Тываның Баштыңы мурнады боттандырар сорулгаларын тайылбырлаан.
Бо ажыл республика девискээринде шагда-ла эгелээш, ам-даа уламчылап турар дээрзин Владислав Ховалыг дыңнаткан.
Сентябрьда болур соңгулдаларга соңгуткан эрге-чагырга органнарынга келир беш чылдың орук карталарын ажылдап кылып турар. Ол планнар Чазактың отчеттуг кампаниязының болгаш республика Баштыңы биле чурттакчыларның хууда ужуражылгаларының үезинде илереттинген чаңгыс чер чурттугларның киирген чагыгларынга үндезилеттинген.
Владислав Ховалыгның чугаалааны-биле алырга, партияның Улусчу программазынче Тываның чурттакчыларындан 6700 ажыг чагыглар кирген. Чоннуң санал-оналдары ам-даа кирип турар.
«Чагыгларның, санал-оналдарның хөй кезии уруглар хайгааралынга хамааржыр – школаларны, уруглар садтарын, хөй-ниити төптерин, библиотекаларны, спорт залдарны тударын болгаш чаартырын, ол ышкаш ойнаар шөлдерни экижидерин дилеп турар. Оруктарны чаартыры – ийиги черде дилег. Үш дугаар чагыг – ТШО-нуң киржикчилеринге болгаш оларның өг-бүлелеринге деткимчени көвүдедири» – деп, Владислав Ховалыг программа дугайында тодаргайлаан.
Оон аңгыда хөй санныг дилег бижиктер башкыларның болгаш эмчи ажылдакчыларының шалыңын көвүдедиринге хамаарышкан. Акша-шалыңны өстүрери – кадрлар айтырыын шиитпирлептер деп санап турарлар. Оон ыңай экологияга хамаарышкан айтырыгларны база киирип турар. Чижээлээрге, Кызыл хоорайның девискээринде агаарның шынары база кол черни ээлеп турар. Владислав Ховалыгның демдеглээни-биле алырга, тыва чон системалыг чидиг айтырыгларны көдүрүп, төрээн Тывазының сайзыралынга хамаарышкан ажыл-херектерни хууда күзелдеринден бедидир салып, күрүне ажылдакчылары дег боданып турар.
Бистиң корр.
Чурукту ТР-ниң Чазааның парлалга албанындан алган.