2024 чылда Тываның 105 өг-бүлези аңгы-аңгы чылдагааннарның уржуундан ада-иезиниң хайгааралы чок арткан уругларны азырап алган. Ол өг-бүлелер бо чылын күрүнеден чаңгыс катап алыр деткимче акшаны алган. Ниитизи-биле ук айтырыгны шиитпирлээринге 7,8 сая рубль көрдүнген турган.
Бо пособиени уруг азырап ап турар азы хайгааралынче ап турар (опека) өг-бүле чаңгыс катап алыр. Ажы-төл азырап ап болур өг-бүле РФ-тиң хамаатылары база үргүлчү Россия девискээринде чурттап турар болур ужурлуг.
Тожунуң, Мөңгүн-Тайганың, Тере-Хөлдүң чурттакчылары – 36 906,45 рубль болза, а регионнуң арткан кожууннарының чурттакчыларынга – 34 446,02 рубль түңнүг чаңгыс катап алыр төлевирни уруг бүрүзүнге алыр. Бир эвес өг-бүле 7 хардан өрү назылыг азы кадыының байдалы кызыгаарлыг уругну, оон ыңай кады төрээн алышкыларны азы угбашкыларны азырап алган болза, 263 195,66 рубльди, а Тере-Хөл, Мөңгүн-Тайга, Тожу кожууннарның төлээлери 281 995,35 рубльди алыр.
Уругну азырап азы хайгааралынче алган соонда, чартык чылдың дургузунда ук пособиени алыр дугайында билдириишкинни киирер. Ол хуусааны судтуң шиитпир үндүрген хүнүнден тура санаар.
Социал фондузунуң Тыва Республикада салбырларынга, хөй ажыл-чорудулгалыг төпке (МФЦ) азы Госуслуги порталын таварыштыр билдириишкинни киирип болур. Пособие алырда уруг азырап алган дугайында документ болгаш бичии кижиниң төрүттүнген дугайында херечилели болгаш акша шилчидер агар саны херек.
Билдириишкин киирген соонда, чогуур албан чери 10 ажыл хүнүнүң дургузунда шиитпирни үндүрер. Шиитпир үнген соонда, 5 ажыл хүнүнүң дургузунда өг-бүле пособиени алган турар.
Социал фондунуң тыва Республикада салбырынче, 8800-200-0543 дугаарже 09.00 шактан кежээ 18.00 шакка чедир долгааш, билдинмес чүүлдерни айтырып ап болур.
А. ОНДАР белеткээн.
«Шын» №42 2024 чылдың июнь 8
