Тываның В. Көк-оол аттыг Национал хөгжүм-шии театры 88-ки театр сезонун хаар байырлыг кежээни эрттирген.
Аңаа хөй-ниити болгаш ачы-дуза чедирилгезинге хамаарышкан улуг чергелиг хемчеглерге идепкейжи киржилгези, хамааты туружу болгаш театрга шынчы бердингени дээш 10 артиске ТР-ниң Чазааның болгаш ТР-ниң Культура яамызының шаңналдарын тывыскан: ТР-ниң улустуң артизи атты Мерген Хомушкуга, ТР-ниң алдарлыг артистери Уран- оол, Аржаана Стал-оолдарга, Шеңне Шоюнга болгаш аныяк артистер Салбак Лапчар, Айдызана Иргит, Өнер Кызыл-оол, Надежда Салчак, Тана Хөвең-оол, Сай-Дажы Найданга дипломнарны тывыскан.
“Чылдың актрисазы” атка ТР-ниң улустуң артизи Луиза Мортай-оол, “Чылдың актеру” атка аныяк артист Шораан Кужаан төлептиг болганнар.
Ол ышкаш “Эң тергиин көрүкчү” атты Екатерина Кононовага тывыскан. Ол 88-ки театр сезонунуң дургузунда 16 шиини көрген, 2024 чылдың дургузунда 55 билетти садып ап, шиилеп турган. Оон аңгыда, театрның социал четкилерде арыннарынга солун комментарийлерни бижип, көрген шиилериниң дугайында бодалдары-биле доктаамал үлежип турганы дээш “Эң тергиин бижикчи” номинацияга Диана Донгак тиилээн.
88-ки театр сезонун “Чүгленген күзел” деп шии-биле хагган.
В. Көк-оол аттыг Национал хөгжүм-шии театрының медээзи болгаш чуруу
“Шын” №39 2024 чылдың май 29
