Кызылдың президентиниң кадет училищезиниң бирги белеткел ротазының кадеттери училищениң директору Уран-кыс Ондарның удуртулгазы-биле Ада-чурттуң Улуг дайынының хоочуну Георгий Абросимовтуң 99 харлааны-биле байыр чедирген.
Бо онзагай хүнде Георгий Васильевичиге байыр чедирери-биле кадеттер-биле кады КПКУ-нуң шериг оркестри болгаш училищениң өске ажылдакчылары келгеннер. Училищениң директору Уран-кыс Ондар хоочуннуң төрүттүнген хүнү болгаш кел чыдар Тиилелге хүнү-биле байыр чедирип, узун назынны, кадыкшылды, сагыш-сеткилинге амыр-тайбыңны күзээн. Шериг оркестриниң үделгези-биле кадеттер «Тиилелгениң хүнү» деп ырыны күүсеткен, Георгий Васильевичиниң мурнунга езулалдыг марш-биле шериг салюдун көргүскен.
"Кымга-даа дайынга азы шериг тулчуушкуннарынга киржирин күзевес мен, чүге дээрге кижилер бот-боттарын өлүрбес ужурлуг. Кадеттерниң эки өөренирин, бот-боттарының аразында найыралдыг болурун болгаш ада-иезин хүндүлээрин күзедим. Ада-өгбелеривисти билип, оларны сактып, хүндүлеп чоруур болзувусса, бут кырынга быжыг туруп кээр бис. Кандыг-даа дайзын бисти тиилеп шыдавас"– дээш, байыр чедирип келген чонунга өөрүп четтиргенин хоочун илереткен.
Бодунуң ээлчээнде кадеттер амыр-тайбың дээр дээш Георгий Васильевичиге өөрүп четтиргенин илередип, улуг чуртувусту олар дег камгалаарын аазааннар.
Кадеттер чүгле байырлалдарда эвес, а анаа хүннерде база бажың ажылынга удаа-дараа дузалажып, хоочунну өөртүп чоруурун КПКУ-нуң парлалга албаны демдеглээн.
Чуруктарны болгаш медээни КПКУ-нуң парлалга албанындан алган.
«Шын» №15 2025 чылдың апрель 24
