Степан Сарыг-оолдуң чогаалдарынга үндезилеттинген “Аңгыр-оолдуң тоожузу” деп долу метражтыг фильмни тырттырып дооскан. Ооң режиссёрлары – Виталий Петров болгаш Ролан Ооржак. Фильмниң баштайгы көрүлдези 2024 чылдың ноябрь айда болур.
Чазак Даргазының оралакчызы Орлан Сарыглар кинонуң тургузукчулары-биле ужурашкан. “Фильмни тургузуп турар үеде Степан Сарыг-оолдуң бодунуң салгалдары киржип турганы кайгамчык-тыр. Оларның үжү эпизодтуг рольдарда ойнап турар. Кинонуң сценарийин Степан Сарыг-оолдуң Дус-Дагга төрүттүнген ырак төрели, Тываның улустуң чогаалчызы Николай Куулар тургускан” – деп, оралакчы демдеглээн.
Фильмни тырттырып турган баштайгы үезинде-ле республиканың чурттакчы чонунуң канчаар-даа аажок сонуургалын ол чаалап апкан. Ылаңгыя кинону тыва дылга болгаш бичии уругларга таарыштыр тырттырганы дээш олар өөрүп четтиргенин илередип турарлар. Ол өзүп олурар салгалды тыва дылынга болгаш культуразынга сонуургалын оттурарынга дузалыг.
Бо кайгамчык Тываның төөгүзүн көргүскен дириг-чурук тырттырар төлевилел Президентиниң культурлуг эгелээшкиннер фондузунуң деткимчези-биле боттанып турар.
Тыва кино режиссерлары Ролан Ооржак болгаш Виталий Петровтуң тырттырган кинозу республиканың кино сайзыралынга чаа-чаа аргаларны ажыдар.
Бистиң корр.
Чурукту интернет четкизинден алган.
“Шын” №63 2024 чылдың август 21
