Октябрь 7-де ТР-ниң Культура яамызынга “Аңгыр-оолдуң тоожузу” деп фильмниң режиссёрлары Виталий Петров база Ролан Ооржак-биле парлалга конференциязын эрттирген. Ук хемчег чогаалчы Степан Сарыг-оолдуң чогаалынга үндезилээн “Аңгыр-оолдуң тоожузу” деп бүрүн метражтыг фильмниң баштайгы көрүлдезинге тураскааткан.
Тываның төөгүзүн көргүскен кайгамчык дириг-чурукту Президентиниң культурлуг эгелээшкиннер фондузунуң деткимчезиниң ачызында тырттырган.
Режиссёрларның демдеглеп турары-биле алырга, бо дириг-чурукта ёзулуг-ла Тываның ёзу-чаңчылдарын болгаш культуразын көргүскен. Виталий Петров биле Ролан Ооржак кинону тырттырып турар үеде эң-не онзагай сагыш-сеткилинге артып калган болуушкуннары-биле үлежип, журналистерниң айтырыгларынга харыылааннар.
“Ажылывыс колдуунда дооступ турар. Хааглыг көрүлдеге чедир санныг хонуктар арткан. Ынаар Степан Сарыг-оол чогаалчывыстың төрелдерин, кинога ойнап турган актёрлар бөлүүн база аалчыларны чалаар бис. Кинону ТАР-ның ССРЭ-ге каттышкан хүнү октябрь 11-де 14.00 шакта “Найырал” кинотеатрынга көргүзер бис. Кол көрүлдени ноябрь айже планнаан. Биске ол дээрге дендии өөрүнчүг болуушкун-дур. Ажылды үезинде доозуп четтигер бис бе деп девидеп, секунда-даа эрттирбейн, ажылдап турдувус. Төлевилел кончуг эки болган. Аңгыр-оолдуң тоожузу школа программазынче кирип турар болгаш, чогаал-биле бис бичиивистен тура таныш бис. Төлевилелди ажылдап кылган сценаристер база материалды эки билир”– деп, Ролан Ооржак чугаалаан.
Амгы үеде монтаж болгаш өңнерин өйлээр ажыл доозулган. Бо чоокку үеде үн каасталгазын болгаш орус дылче очулдурган субтитрлерни тургузары доосту бээр. Дириг-чурук 1 шак 40 хире минута үргүлчүлээр.
Кинону тырттырган команда кады ажылдажып, дузалашканы дээш Тываның Чазаанга, Культура яамызынга, Өвүр кожууннуң чурттакчыларынга, фильмни тырттырарда, техниказы-биле дузалаан Чогаадыкчы үлетпүр школазынга четтиргенин илереткен.
Чыжыргана СААЯ.
Буян Ооржактың тырттырган чуруктары.
“Шын” №77 от 2024 чылдың октябрь 9
