Кудумчу аштакчызы таиланд кыс TikTok ачызында модель апарган.
28 харлыг Ноппаджит Мин Сомбунсата хеп-хенертен социал четкилерниң сылдызы болгаш модель бизнезиниң чаа арны апарган. Ол төөгү мынчаар эгелээн.
Россия чурттуг кудумчу фотогравы Семён Резчиков кудумчу аштап турар кысты тырттырган ролигин TikTokка салыпкан.
Бөдүүн идик-хептиг-даа болза, бир тускай онзагай Минниң кудумчу аштап турар кадрлары интернет четкизинге тарай берген. Ооң бойдустан чайгаар бүткен чаражы модельдер агентилелдериниң кичээнгейин хаара тудупкан.
Ооң чаа ажылының бирги базымы «Art of the Devil» деп таиланд хоррор (көрүкчүлерге азы номчукчуларга коргунчуг байдал тургузар тускай жанр) хевиринге тырттырып эгелээн. Ынчан визажистер коргунчуг боорда, кайгадыптар онзагай макияжты Минниң арнынга чогаадып чуруптарга, соцчеткилерге улам хөлзээшкинни болдурган.
Амгы үеде Мин сураглыг брендилер-биле кады ажылдажылганы чорудуп, харын-даа «Nong Chat’s Browit» деп таиланд косметика компаниязының арны болган. Ооң төөгүзү делегейниң муң-муң кижилерин сорук киирип турар. Кижиниң чуртталгазын өскертиптер чүүл кайыын-даа чедип кээп — душ бооп TikTokка тырттырыпкан видео безин ооң бадыткалы-дыр.
«Чуртталгам ынчаар өскерли бээр деп кажан-даа бодавайн чораан мен. Анаа-ла ажылым кылып чордум. Ам бир-ле чаа чүүлдү шенеп кылыр арга менде бар» — деп, Мин чугаалап турар.
Мооң үлегер-чижээ-биле алырга, социал четкилер болгаш талантылыг фотографтар делегейге чаа «сылдыстарны» ажыдып болурун көргүзүп турар. Кым билир, келир үениң сураглыг кижизи кудумчу аштап азы бир-ле кафеде ажылдап турарын.
/ Интернеттен хоолгалаан.
“Шын” №48 2025 чылдың декабрь 11
