«Россия хөй аргаларлыг чурт» деп Президент платформазыныӊ «Абилимпикс» регионалдыг чемпионадынга 6 школачы, 7 студент, 2 специалист тиилээн.
Үстүнде айыткан организацияныӊ кол сорулгазы – харык-шинээ кызыгаарлыг кижиниӊ ниитилелде туружун бедидери, кылып билир мергежилин көргүзери, оларга депшиир арга (социальный лифт) бээри.
«Абилимпикстиӊ» регионалдыг чемпионады май 16 -19 хүннеринде Тываныӊ Информастыг технологиялар, политехниктиг тудуг болгаш техникумнарынга, республиканыӊ эмчи колледжинге, Кызылдыӊ экономика болгаш эрге-хоойлу техникумуга, 10 дугаар ортумак школага, дүлей уругларныӊ школа-интернадынга болуп эрткен.
Чемпионат тускай сорулгалыг болганда, ооӊ киржикчилерин үш бөлүкке хувааган.
Школачы чемпионнар
«Идик септээр» мергежилдиӊ тиилекчизи Айдажы Донгак, «Чазаныр ажылдыӊ» тиилекчизизи Айрат Ооржак, «Ыяшка оюп хээлээр» мергежилдиӊ тиилекчи Сайдаш Серен-оол болган.
– Бо чемпионатка киржири өөреникчилерге чаа-чаа аргаларны берип турар. Уруглар боттары сорулганы салып алгаш, ону чедип алыр дээш, кызып, ажылын бедик деӊнели-биле кылып күүседип, бодунга хынамчалыг болур. Шынарлыг ажылдыӊ үнезин билир апаар – деп, Республиканыӊ кадыы кызыгаарлыг уруглар өөредир 10 дугаар школазыныӊ технология башкызы Ольга Иванова тайылбырлаан. Ол чемпионаттыӊ «Дааранылга» мергежилиниӊ талазы-биле кол эксперти.
Студент чемпионнар
«Бисероплетение» – шуру-чинчи дизер уран-шевер мергежилге Онзагай Моӊгуш, «Очулга» мергежилинге Сайхо Тамдын, «Веб-дизайн» мергежилинге Начын Сереп, «Ыяшка оюп хээлээр» мергежилге Чаян Ховалыг, «Спорттуӊ бөдүүнчүткен хевиринге» Мөӊге-Белек Кулбузек, «Хеп быжыкчызы» деп мергежилге Идегел Ооржак, «Аъш-чем кылыры ажыл-херек» деп тускай мергежилге Яна Моӊгуш, «Эмчи болгаш социал азырал» мергежилге Никита Якушенко тиилээн.
Специалист чемпионнар
Чаагай аъш-чем быжырар «Тыва хуужуур» мергежилдиӊ тергиини Сылдысмаа Сагановна Дагба, а «Илбектеп аргыырынга» уран -шевер тиилекчи Чечена Амыр-ооловна Куулар болган.
Кижи бодунуӊ күш-шыдалын, кылып шыдаар чүүлүн көргүзеринге бо чемпионат таарымчалыг арга болуп турар дээрзин регионалдыг чемпионаттыӊ киржикчизи Айыраана Сат чугаалаан.
Мергежилинге стажировка эртер арга бар
- Абилимпикс шимчээшкини профессионал эртем-билииниӊ, ажылыныӊ тергиинин чедип алырынга чылдагаанны тургузуп турар. Бо программада 70 ажыг мергежилдер бар. Чемпионатка киришкеш, бодунуӊ мергежилиниӊ мастери деп чүүлдү бадыткап көргүзүп, шилип алган профессиязыныӊ аайы-биле стажировка эрткеш, ажылга кирип алыр аргазы бар – деп, Профессионал өөредилге сайзырадыр институттуӊ директору Игорь Грибанов тайылбырлаан.
Өөрүнчүг-дүр
- Киржикчилерни ажылче хаара тудары - кол сорулганыӊ бирээзи. Бо чемпионатка Тыва Республиканыӊ ажыл – берикчилериниӊ сеткилинден сонуургап турары өөрүнчүг-дүр. Чемпионат шимчээшкинин хөгжүдүп сайзырадырынга регионнуӊ удуртулгазыныӊ кичээнгей салып турары – киржикчилерге боттарыныӊ мергежилиниӊ чаӊчылдарын тергиин кылдыр көргүзүп, тиилелгеже чүткүвүшаан, чедиишкиннии-биле ажылдап кирип алырынга идиг болур – деп, «Россия хөй аргаларлыг чурт» деп организацияныӊ чиӊгине директорунуӊ бирги оралакчызы Алексей Агафонов чугаалаан.
Делегейде инвалид болгаш харык-шинээ кызыгаарлыг улустуӊ мергежилиниӊ аайы-биле мөөрейлежир чаӊгыс системазы Абилимпикс шимчээшкини болуп турар. Чылдан чылче киржикчилерниӊ, эксперттерниӊ саны көвүдеп турар. Тывада ооӊ VII дугаар регионалдыг чемпионадын түӊнээни бо – дээш, республиканыӊ өөредилге сайыды Алексей Храмцов тиилекчилерге байыр чедирген.
Чемпионатка шупту 14 өөредилге организацияларындан 99 кижи киришкен. Оларныӊ аразында тус-тус мергежилдерге 48 кижи шылгараан. Тиилекчилерниӊ шуптузунга шаӊналдарны, суй-белектерни тывыскан.
Россияныӊ бүгү регионнарындан тиилекчилер Москвага «Абилимпикс» национал чемпионадынга киржир.
Тыва Республикада «Абилимпикс» төвүнүӊ медээзи-биле Р.Демчик белеткээн.
