Россияның Федералдыг кеземче албанының Тыва Республикада эргелелинде чурттуң дээди өөредилге черлеринче абитуриентилер чыыр кампания уламчылап турар.
Доозукчуларга мергежил шилип алырынга идигни берип, Федералдыг кеземче албанынга хамаарылгалыг дээди өөредилге черлеринче дужаап кирер аргалар дугайында регионнуң кеземче албанының 2 дугаар эмнеп-эдип-чазаар албанының ажылдакчылары школаларга чедип, ужуражылгаларны эрттирген. Боттарының кылып чоруур ажыл-албанының дугайында уругларга билдингир, тода кылдыр тайылбырлаан.
Хоругдал чериниң ажылдакчылары доозукчуларга Федералдыг кеземче албанының шугуму-биле дээди эртемни халас чедип ап болурун, өөредилге программазын болгаш дужаап кирериниң дүрүмнери, негелделери-биле таныштырган.
Ужуражылга үезинде эдип-чазаар албан черлериниң ажылының онзагай талаларын, өөренип турар курсантыларга болгаш кеземче албан черинде ажылдап чоруур ажылдакчыларга хоойлу ёзугаар көрдүнген социал магадылалдар, чиигелделер дугайында тайылбырлап, уругларның сонуургап салган айтырыгларынга харыылап берген.
Неделя дургузунда найысылалдың 9 дугаар гимназиязы, 3 болгаш 17 дугаар школалары, Б.И. Араптан аттыг Сукпак ортумак школазының доозукчулары-биле ужуражылгаларны эрттирген.
Федералдыг кеземче албанынга хамааржыр дээди өөредилге черлериниң болгаш канчаар дужаап кирериниң дугайында тодаргай медээлерни Россияның Федералдыг кеземче албанының Тывада Эргелелиниң албан сайтызында «Өөредилге» деп адырдан билип ап болур https://17.fsin.gov.ru/obuchen... .
Дээди өөредилге черлеринге өөренир күзелдиг кордакчылар Федералдыг кеземче албанының Тывада салбырларының кадрлар килдистеринче долгааш, айтырып ап болур: Федералдыг кеземче албаны (УФСИН) - 945-66, 1 дугаар эдип-чазаар колония – 94-626, 1 дугаар Истелге изолятору– 94-567, 2 дугаар эмнеп-эдип-чазаар албан чери – 94-708, 3 дугаар колония (КП-3) – 94-649, Шагаан-Арыг хоорайда 4 дугаар эдип-чазаар колония – 8(39436) 94-826. Немелде медээлерни тодаргайы-биле билип ап болур дугаар: 8 (394) 22-9-45-66.
Федералдыг кеземче албанының парлалга албаны.
“Шын” №5 2026 чылдың февраль 12
