Февраль 14-те Мөген-Бүрен сумузунга Россияда болгаш Тыва Республикада чарлаттынган Ада-чурт камгалакчызының чылы байырлыг байдалга ажыттынган. Ооң-биле чергелештир, ТШО-га маадырлыы-биле чок болган чаңгыс чер чурттуувус Шаанак Базыр-оолович Иргиттиң чырык адынга тураскааткан тыва национал хүреш маргылдаазы 1–11 класстарның өөреникчилериниң аразынга хар-назы аайы-биле 4 аңгы бөлүкке болуп эрткен.
Чылдың ажыдыышкынының байырлыг чыскаалынга сумунуң адалары – адыгжылар, Херээженнер чөвүлели, арбаннарның чурттакчылары, өөреникчилери, маадырывыстың чоок улузу дээш суурнуң чону шупту киришкен. Байырлыг хемчегниң эң-не бичии киржикчилери– “Алёнушка” уруглар садының чаштарының ыры-шүлүү, танцы-самы ажыдыышкынга улам чараш шинчи киирген.
Арбаннарның чурттакчылары, албан черлериниң киржилгези-биле чылдың ажыдыышкыны суурнуң спорт залынга бедик деңнелге эрткен. Улаштыр хүреш маргылдаазынга школачылар ачыр-дачыр тудушканының түңнелинде:
1–2-ги класстар аразынга хүрешке 16 мөге аразындан
1-ги черни Алиат Салчак, 2-ги черни Базыр Иргит, 3-кү черни Уруктай Саая, 4-кү черни Шаанак Иргит алган.
3–4-кү класстар аразынга база 16 мөге хүрешкен. 1-ги черге Айдемир Маска, 2-гизинге Аюхан Салымчан, 3-кү черге Шаанак Иргит, 4-күзүнге Тандыжап Салчак төлептиг болганнар.
5–7 класстар аразынга 32 мөге күжүн шенешкен. Аңаа
1-ги черни Алексей Тюлюш, 2-ги черни Энерел Хертек, 3-кү черни Чимит Иргит, 4-кү черни Эрес Тюлюш алган.
8–11 класстар аразынга хүрешкен 32 мөге аразындан
Серээ Алитет шүүлген, Борбай-оол Чимит үжүүрлешкен. 3-кү черни Джамиль Ондар, 4-кү черни Азиат Салчак ээлээн.
Ол ышкаш тускай шаңналдарны: "Чараш девиг" – Делгер-оол Дензин, "Чараш арга”– Иргит Отчугаш тус-тузунда алганнар.
ТШО-га эрес-дидим дайылдашкаш, амы-тынындан маадырлыы-биле чарылган чаңгыс чер чурттуувустуң авазы Уран Иргит болгаш кады төрээннери, чоок улузу хүреш маргылдаазының бүгү тиилекчилеринге медальдар, грамоталар болгаш акша шаңналдарын тывыскан.
Ук хемчегни эрттиреринге үлүг-хуузун киириштирген арбаннар даргаларының, депутаттарының, удуртукчуларның идепкейлиг киржилгезин демдеглеп, өөрүвес арга чок.
У. ИРГИТ.
Мөген-Бүрен суур.
Авторнуң тырттырган чуруктары.
«Шын» №7 2025 чылдың февраль 27
