Тываның Баштыңы Владислав Ховалыг Москвага ажылчын сургакчылаашкын үезинде Тывада чаа тудуг объектилериниң дугайында чугаалажыышкыннарны кылган.
Россия Федерациязының кадык камгалал сайыды Михаил Мурашко-биле Кызыл хоорайга чаа уруглар эмнелгезин тудар төлевилелди сайгарып чугаалашкан. “Россияның Кадык камгалал яамызының саналдап турары-биле алырга, чаа эмнелгени амгы уруглар эмнелгезиниң чанынга тударын тодараттывыс. Чаңгыс аай таарымчалыг комплекс болзун дээш, төлевилелди шынарлыг чорударынче бүгү-ле күжениишкинни үндүрүп, медицина талазы-биле техниктиг ажылдарны тодарадыр бис” – деп, Владислав Ховалыг бодунуң блогунда бижээн.
Ол ышкаш понедельникте Москвага Тываның специалистериниң киржилгези-биле хуралды эрттирерин ол дугурушкан. Бо чылгы ажылдың акшаландырыышкынының хемчээлин база чугаалашканын ол демдеглээн.
Тыва Республиканың ЫМК-ның (Ыяап-ла медицина камгаладылгазы) девискээр фондузунуң директору Шолбан Күжүгет уруглар эмнелгези республикага агаар дег херек дээрзин демдеглевишаан, ылаңгыя хөй профильдиг болурун немээн: “Амгы уруглар эмнелгезинде хирургия албаны чок. Тудугну кылырда, анаа-ла чаа оран-сава тудуп каар эвес, аңаа уругларга хирургия албанын организастаары негеттинип турар. Уруглар эмнелгезиниң удуртукчузу республиканың база бир кол дуржулгалыг хирургу болганда, аңаа уругларга хирургия, урология, травматология, нейрохирургия, ЛОР аарыгларын эмнээр салбырлар турар”.
Тываның Баштыңы Россияның чырыдыышкын сайыдының оралакчызы Андрей Николаев-биле ужурашкан санында-ла акшаландырыышкын хемчээлин шүүштүрүп турарын демдеглээн. Чүгле “Өөредилге” национал төлевилел-биле безин бистиң республикавыста 10 өөредилге объектизин туткан.
Владислав Ховалыг июль 26-да Таңды кожууннуң Балгазын болгаш Бай-Хаак суурларында школа тудугларын хынап четкен. Объектиде график ёзугаар ажыл чоруп турарын видео-хайгаарал дузазы-биле көрүп болур. Оон аңгыда, 2024 чылда көдээ школаларга капитал септелге чорудар чагыгларны ТР-ниң Чырыдыышкын яамызында ажылдап кылып турар.
Чыжыргана СААЯ белеткээн.
Ада ТЮЛЮШТУҢ тырттырган чуруктары.
"Шын" №56, 2023 чылдың июль 29