«Агростартап» мөөрейге тиилекчи болган эгелеп чоруур тыва фермерлер 24 сая хире рубльди алырлар.
Мөөрейге киирген чагыгларны комиссия сайгарып көргеш, оларның аразындан 12 кедилиг, күрүнениң хөгжүлдезинге ажык-дүжүктүг болуп болур чагыгны хүлээп алган. Республиканың Көдээ ажыл-агый болгаш аъш-чем яамызының дыңнадып турары-биле алырга, олар дээрге Барыын-Хемчик, Чеди-Хөл, Таңды, Улуг-Хем, Каа-Хем, Кызыл, Бии-Хем, Сүт-Хөл, Чөөн-Хемчик, Эрзин, Тере-Хөл кожууннардан болгаш Ак-Довурак хоорайдан фермерлер-дир.
«Биче база ортумак сайгарлыкчы чорукту болгаш хууда сайгарлыкчы эгелээшкинни деткиири» национал төлевилелдиң иштинге эгелеп чоруур фермерлерге шаңнал акшаларны чылдың эртер шилилге мөөрейиниң түңнелдерин барымдаалап тыпсып турарын сагындыраалы.
Киирген бизнес-планнардан алырга, алган субсидияларын аныяк фермерлер кол нуруузунда көдээ ажыл-агый техниказын болгаш херекселдерин, мал-маган садып алырынче чарыгдаар деп турар.
Шак ынчалдыр, Таңды кожууннуң Кочетов суурдан Мерген Лапчаа инек азыраар күзелдиг, алган шаңнал акшазы-биле мал чеми белеткээр техника садып алыр сорулгалыг, сөөлүнде барып, мал семиртир черни ажыдарын планнап турар..
Мижит-Доржунуң өг-бүлези Улуг-Хем кожуунга тевелерниң баш санын катап тургузар бодалдыг, ону боттандырары-биле, Калмыкиядан тевелерни садып алыр планныг. Эрткен чүс чылдың 90 чылдарынга чедир Улуг-Хемге тевелерниң саны 300 баш ажыг турган. Артып калган азырал малдың кол нуруузу бүдүрүкчү шынары баксыраан бууралар болуп турар. Кедизинде барып, теве дүгүн болбаазырадыр, оон шынары бедик кылыгларны бүдүрер сорулгалыг.
Барыын-Хемчиктен Чойган-оол Дамбыра сарлык өстүрерин бодап турар. Салгал дамчаан малчын ам безин бодунуң ажыл-агыйында элээн каш бода база шээр малдыг.
Ак-Довурак хоорайдан Оксана Каң-оол грантының акша-хөреңгизин ногаа шыгжамырының эде чаартылгазынче углаар.
Күрүнениң деткимчезин алган фермерлерниң мурнунга хууда көргүзүглерни, социал магадылалдар-биле хандыртынган болгаш үндүрүглер төлээшкинниг тодаргай хостуг ажылчын туруштарны тургузар сорулганы салган. Төлевилелдерни, ооң боттанылгазының бүгү-ле чадаларынга, ол бүгүге тускай тургустунган ажылчын комиссия хайгаарап, хынаар дээрзин Тываның Көдээ ажыл-агый болгаш аъш-чем яамызы дыңнадып турар.
/ А. ХЕРТЕК белеткээн.
"Шын" №25 2023 чылдың апрель 8
#Шынсолун #ТываныңЧазаанда #Тыва #Агростартап #Улуг_Хем #Барыын_Хемчик #Ак_Довурак #КөдээАжылагый
