Тываның Баштыңы Владислав Ховалыг хөй ажы-төлдүг ие Айнааш Ондарга «Маадыр ие» хүндүлүг атты тывысканы-биле байыр чедирген. 12 российжи региондан хөй ажы-төлдүг иелерни шаңнаарының дугайында Россия Федерациязының Президентизи Владимир Путинниң чарлыы четвергте парлаттынган. Документиде «өг-бүле институдун быжыглаарынга болгаш ажы-төл кижизидилгезинге улуг ачы-хавыяазы дээш» атты тыпсырын тайылбырлаан.
Күрүне Баштыңының демдеглээн херээженнериниң бирээзи – бистиң чаңгыс чер чурттуувус Айнааш Ондар болган. Ол 2022 чылда «Тываның Маадыр иези» атты алган турган.
«Айнааш Владимировна Ондар – үлегерлиг хөй ажы-төлдүг иениң чижээ» – деп, Владислав Ховалыг бодунуң байыр чедириишкининде демдеглээн. Айнааш Владимировна өөнүң ээзи Олимпий Алексеевич Монгуш-биле 11 ажы-төлдү кижизидип өстүрген. Каа-Хем суурда чурттап, ажыл-агыйны тудуп турар. Айнааш Владимировнаның өг-бүлезиниң эр ээзи – тускай шериг операциязының киржикчизи. Оларның улуг оглу Зоригто Монгуш база ТШО киржикчизи, дайынчы хөделиишкиннер хоочуну, дайынчы даалгазын маадырлыг күүсеткени дээш Суворов медалы-биле шаңнаткан.
Айнааш Владимировна өг-бүлези улуг, бажыңында кылыр ажылы чеже-даа хөй болза, хөй-ниити ажылынга киржир үени-даа, арганы-даа черле тып алыр, «Бүгү-россияның Херээженнер эвилели – Россияның Идегелиниң» идепкейжизи.
«Чедиишкиннери дээш дыка өөрүп тур мен. Ондар-Монгуштарның улуг өг-бүлезинге кадыкшылды болгаш аас-кежикти күзеп тур мен!» – деп, Тываның Баштыңы социал четкилерде бодунуң блогунда бижээн.
Россия Федерациязының хоойлужудулгазы езугаар, он болгаш оон хөй ажы-төлдү өстүрүп кижизиткен херээженнерге «Маадыр ие» атты база ооң ылгавыр демдээ кылдыр «Маадыр ие» орденин тыпсыр.
ТР-ниң Чазааның парлалга албаны.
“Шын” №73 2024 чылдың сентябрь 25
