Чөөн-Хемчик кожууннуң полиция ажылдакчылары «Шуралгак» лагеринде дыштанып турар уруглар-биле ужуражылганы чоруткан.
«Шуралгак» лагериниң ийи дугаар ээлчээ июль 4-тен июль 24-ке чедир уламчылаар. Ында ниитизи-биле 50 уруг арыг-агаарлыг черде дыштанып турар. Полиция ажылдакчылары лагерьниң уруглары-биле ужуражылганы ийи удаа эрттирип турар. Үнүүшкүннерниң кол сорулгазы – назы четпээн уруглар аразынга хоойлуга удур корум-чурум үрээр таварылгаларны баш удур болдурбазынга тайылбыр ажылын чорудары.
Полиция ажылдакчылары уругларга назы четпээн хоойлу хажыдыкчылары-биле ажылдаар килдистиң ажыл-чорудулгазының, өнчү-хөреңгизин камгалаарының дүрүмнерин, хөй-ниити черинге бодун алдынарының болгаш бот-боттарынга хүндүткелдиг хамаарылгалыг болурунуң дугайында тайылбыр ажылын чоруткан.
Оон аңгыда уругларга орук дүрүмнерин хажыдып, чолаачы документизи чокка машина мунуп, чурум үрээни дээш онаар харыысалга дугайында доктаамал тайылбырлап турар дээрзин полиция ажылдакчылары демдеглеп турар. Административтиг болгаш кеземче херээн онаап болур назы-хар болгаш комендантының шагының дугайында уругларның эки билирин олар дыңнадып турар.
ИХЯ-ның медээзи-биле А. ДОНГАК белеткээн.