Тываның Чазаанга ажылчын неделя чаңчылчаан Аппарат хуралы-биле эгелээн. Аңаа элээн каш чугула айтырыгларны чугаалашкан. Хүннүң айтырыының кол темазы республиканың девискээринге өрт болгаш үер айыылынга белеткел дугайында болган.
«Бистиң мурнады көөр сорулгавыс — чурттакчы чоннуң айыыл чок чоруу, оларның кадыын болгаш эт-хөреңгизин камгалаары. ОБЯ-биле кады бирден бирээ чокка медээлерни сайгарып, айыылдыг зоналарны тодараттывыс. Бо чылын агаар-бойдус кадыг-дошкун болуп турар: өрт айыылының сезонун эрте ажыдып тур бис, март 30-ден тура, а хемнерниң частып бадарын апрель ортан үезинде манап тур бис. Кол кичээнгейни — хар эвээш болганындан хову өрттери өөскүп болур барыын кожууннарже база биче хемнерже угландырар. Кандыг-даа айыылды эвээжедири-биле баш бурунгаар ажылдап турар бис» — деп, Тываның Баштыңы Владислав Ховалыг социал четкиде бодунуң арнынга демдеглээн.
Тываның Баштыңы харыысалгалыг ведомстволарга элээн каш даалгаларны берген:
- онза байдал болуп болур таварылгада дүрген хөделиринге материалдыг болгаш саң-хөө курлавырларын четчелээр;
- чурттакчылыг черлерни долгандыр камгалал дилиндектерни тургузар;
- март 28-ке чедир шупту араттар-биле өрт айыылын болдурбас дугайында дугуржулгаларны чарар;
- Кызылдың чамдык микрорайоннарынга СМС-дыңнадыглар айтырыгларын ажылдап кылыр;
- түр үеде чурттадыр пунктуларның хыналдазын чорудар.
А. СОЯН.
Чурукту Тываның Баштыңының социал четкиде арнындан алган.
“Шын” №10 2026 чылдың март 19
