Ак-Довурак хоорайның мэриязының медээзи-биле алырга, декабрь 9-та немелде котёлду одап эгелээн. Бо хүннерде ийи котёл агрегады ажылдап турар база бир котёл курлавырда.
Сөөлгү үеде хоорайның хөй аал чурттаар бажыңнар чурттакчыларындан квартиралар соок деп хөй санныг хомудалдар социал четкилерде тарап нептерээн. Хоорайның бир уруглар садында чылыг хандырылгазы багайын база дыңнаткан.
Тываның Чазааның Даргазының оралакчызы Олег Лукин Ак-Довуракта тургустунган байдалды сайгарып, аңаа ажылдаан. Чылыг-хандырылга бүдүрүлгезинге чедип, специалистер-биле чугаалашкан. Хыналда үезинде хоорайже чылыг бээр четкилерде температура даштын соокка дүгжүп турар болган. Эксперттерниң түңнелинден алырга, ак-довуракчыларның квартираларында соок байдал — бажың иштиниң четкилери шын эвес ажылдап турарында азы батареялар болгаш хоорзаларның туна бергенинде.
Одалга системазында базыышкынның чедишпезинден хөй аал чурттаар бажыңнарда суг чүгүртүр насостарны хоорайның чылыг четкизиниң төнчү ийи объектизинде салган болган.
«Чылыг дамчыдылгазын дүргедедир дээш, объектиниң ээлери насостарны боттары салганы илереттинген. Ынчангаш объектилерниң системазында базыышкын куду болганындан, кырыкы каъттарже чылыг четпейн турган» — деп, Тываның Чуртталга-коммунал яамызы тайылбырлаан.
Чөпшээрел чокка коштунган насостарны өжүрген, ооң түңнелинде, квартираларда, ада-иелерниң дыңнадыг киирген уруглар садында чылып келген.
Бажыңнар иштинде четкилерниң ажылдаары-биле холбашкан чидиг айтырыгларны илередиринге болгаш оларны чайладырынга бүгү-ле чугула дузаны муниципалдыг тургузугга чедирерин Тываның Чуртталга-коммунал ажыл-агый яамызының удуртулгазынга дааскан. Оон аңгыда, чурттакчыларның хөй санныг дилеглеринге даянгаш, ол ышкаш даштын сооп келгенин барымдаалааш, ийиги котёлду ажылдадыр деп чылыг хандырылга организациязы — ЧЭK-4 башкарыкчы компания шиитпирлээн.
Амгы үеде хоорай чурттакчыларының бажыңнарында чылыг өй-тавында дээрзин Ак-Довурактың мэриязы дыңнаткан.
Тываның Чазааның Даргазының оралакчызы Олег Лукин хоорайның хөй аал чурттаар бажыңнарында чылыг хандырылгазын хыналдада алганын демдеглээн. Бир эвес чылыг хандырылгазынга хамааржыр айтырыг тургустуна берзе, Ак-Довурактың чурттакчылары 89235459061 дугаарлыг “ЧКА тудуг” башкарыкчы компанияның диспетчер албанынче долгап болур.
Бистиң корр.
“Шын” №96 2024 чылдың декабрь 14