Эрзин кожууннуң Мөрен суурга өндүр бедик Ак-Хайыраканывыстың оваазын июнь 9-та дагыдывыс. Ол хүн аңаа янзы-бүрү хемчеглерни организастаан. Чалаткан буянныг башкылар Лакпа Шактар биле Айдың Билбаа дагылгага келген чоннуң хей-аъдын көдүрүп мөргүлдү номчаан. Сумувустуң хоочун малчыннары Делгер Дамдыновна Саачының, Чечек Шириновна Ооржактың ажы-төлү оваа дагылгазын деткикчилеп, организастап эрттирген.
Бичии оолдар аразынга хүрешке Санчай Намчаа (Сылдыс) шүүлген, Өлчей Ширме (Мөрен) үжүүрлешкен. 3–4-кү черлерни Алдын-Херел Чажытмаа (Эрзин), Доржу Севек-Даваа (Мөрен) алганнар.
Улуг мөгелер аразынга Баазан-Доржу Сандак (Мөрен) тергиидээн, Амыр-Санаа Ооржак (Мөрен) үжүүрлешкен. 3–4-кү черлерге Сүдер Намчаа (Эрзин), Эртине Данегыт-Бады (Мөрен) төлептиг болганнар.
60 хардан өрү назылыг улус аразынга чадаг чарышка хоочуннар аныяктардан дудак чок маңнааннар. Түңнелинде, бирги черни Дажы-Серен Бичелдей алган. Ийиги черге Лопсан Араптан, үшкү черге Григорий Хүдер тергиидээн.
Мөрен суурнуң культура ажылдакчылары Адис Белчээ, Радж Дангыт олар чаңгыс чер чурттугларынга хөгжүмнүг байырны бараалгаткан.
Ак-Хайыраканның оваа дагылгазы маргылдааларлыг, оюн-тоглаалыг дыка-ла солун, көрүштүг, бедик деңнелдиг эрткен.
Чечекмаа САДИ, ТР-ниң алдарлыг ажылдакчызы.
Эрзин кожуун, Мөрен суур.
“Шын” №47 2024 чылдың июнь 26
