Тываның Баштыңын АКШ-тың Күрүне департаментизиниң хоругларынга таварышканынга хамаарыштыр тайылбырны берген
ТР-ниң Баштыңы Владислав Ховалыг АКШ-тың Күрүне департаментизиниң хоругларынга таварышкан дугайында тайылбырны кылып, Ада-чурттуң Улуг дайынының үезинде тыва эки турачылар Украинаны фашистерден хостаарынга киришкенин сактып, ол дугайында субботада ТАСС информастыг агентилелинге чугаалаан.
“Шынын чугаалаарга, мээң ат-сывым хоруглар даңзызынче киргени мени дүвүретпейн турар. Мени бистиң чуртувустуң болгаш республикавыстың хөгжүлдези база бистиң шериг албан-хүлээлгелиглерниң, оларның өг-бүлелеринге деткимче көргүзери сагыш аартып турар. Бистиң дайынчыларывыс өгбелериниң соон салгап чоруп турар. ССРЭ-ниң фашистиг Германияга удур демиселинге эң баштайгы талалакчызы турганын эвээш улус билир, чүге дизе ол үеде бот-догуннаан Тыва Арат Республика турган. Ада-чурттуң Улуг дайынының үезинде тыва эки турачылар ылаңгыя Украинаны фашистерден хостаан болгай” – деп, В. Ховалыг демдеглээн.
Оон аңгыда, Республиканың Баштыңы Тываның чурттакчы чону ЛУР биле ДУР-га эң-не баштайгы гуманитарлыг дузаны катканнарның бирээзинге хамааржырын немей демдеглээн. “Мурнувуста кылыр ажылдарывыс хөй, барыын чурттарның аажылалынче кичээнгей салыр үе чок” – деп, В. Ховалыг түңнеп чугаалаан.
Тыва Чазактың сан-чурагайы-биле республикадан тускай шериг операциязында 3 муң хире дайынчылар киржип турар. Ол дээрге Тываның чурттакчыларының 1 хуузу-дур.
Пятницада АКШ-тың Күрүне департаментизи Россияның он регионнарның баштыңнарынга, РФ-тиң тос сайыттарынга, ооң иштинде Культура, ОБ, Спорт, Энергетика, Чурагайлыг хөгжүлде яамыларның сайыттарынга удур хоругну чарлаан. Оон аңгыда, Күрдепартамент РФ-тиң ЧК-ниң (Чепсектиг Күштериниң) 1 219 төлээлеринге удур виза кызыгаарлаашкынын киирген.
ТАСС-тың медээлеринден.