Акцияныӊ ачызында 200 донор немешкен.

Бүгү-делегейниӊ чүн донорунуӊ хүнүнге тураскааткан акция сентябрь 15-тен октябрь 15 -ке чедир чурттуӊ 35 регионнарынга болуп турган.
Темалыг мастер-класстар, лекциялар болгаш донорларга тураскааткан 84 аӊгы хемчеглерге 20 муӊ кижи, ооӊ иштинде Тывадан 800 кижи киржип турган.

Бо акцяны Россияныӊ Кызыл Крестизи деп хөй ниити организациязы демдеглеп эрттирип турган. Ол найысылдыӊ Арат шөлүнге, «Азия төвү» тураскаалдыӊ чанынга болуп турган.

Чүннү дужаарда, NLA-типирование хан уксаазын тодарадыр, күш-шыдалдыг донор бооп болурунга хамаарыштыр хыналданы эртериниӊ дугайында тайылбырлавышаан, информация бижээн материалдарны берип, улустуӊ сонуургаан айтырыгларынга Кызыл Крестиниӊ Тывада регионалдыг салбырыныӊ кежигүннери харыылап берген.

Совет Эвилелиниӊ Маадыры Т.Б.Кечил-оол аттыг Кызылдыӊ №3 ортумак школазыныӊ улуг класстарынга «Чүн донору» деп темалыг квест-кичээл эрттирген.

- Россияныӊ иштинде чүн донорларыныӊ чаӊгыс аай күрүне даӊзызын бо чылдыӊ сентябрь 1-де тургузуп эгелээн. Бүгү-российжи акцияны бир ай дургузунда эрттирип келгенивистиӊ ачызында 200 донор немежип келген. Чүн донору болуп шыдаар улустуӊ саны хөй болурга, аар-берге аарыглыг кижилерниӊ сегип эттинери, оларныӊ амы-тынын камгалаар аргалар немежип турар – деп, Россияныӊ Кызыл Крестизиниӊ даргазыныӊ бирги оралакчызы Виктория Макарчук чугаалаан.
Бүгү-делегейниӊ чүн донорларыныӊ хүнүн 2015 чылдан тура чылдыӊ-на сентябрь айныӊ үш дугаар субботазында, демдеглеп турар.
Бо чылын Россияныӊ Кызыл Крестизиниӊ регионалдыг салбырлары акцияныӊ шугуму-биле школачыларга болгаш студентилерге солун кичээлдерни эрттирип турган. Чүн донорларыныӊ буянныг ачы-дузазы-биле эттине берген улустуӊ «Живая встреча» деп ужуражылгазы Пермь крайга болган. Башкортостан Республиканыӊ хүндүлүг донорларынга Россияныӊ Кызыл Крестизиниӊ сувенирлерин тывыскан.
Ук акцияны «Россияныӊ Кызыл Крестизиниӊ ажыл-чорудулгазын деткиири» деп федералдыг төлевилелдиӊ шугуму-биле, РФ-тиӊ Кадык камгалал яамызыныӊ, РФ-тиӊ эмчи-биологтуг агентилелиниӊ, Н.И Пирогов аттыг университеттиӊ деткимчези-биле эрттирген.
«Россияныӊ Кызыл Крестизи» деп организацияныӊ медээзи-биле Р.Демчик белеткээн.