Чайгы дыштанылга үезинде Тываның профессионал ортумак өөредилге черлериниң сургуулдары дыштанырындан аңгыда сургуулчуларның ажылчын отрядтарынга ажылдап четтигип турарлар. Теория-биле чепсегленгеш, билиглерин практика кырынга боттандырары-биле капитал септелге болгаш тудуг ажылдарынга идепкейлиг киржип турарлар.
Амгы үеде студотрядтарда 105 сургуул хаара туттунган. Оларның аразындан 99 кижи тудуг болгаш капитал септелге ажылдарын чорударынга боттарының өөренген билиин практика кырынга быжыглап турар. Бо чылын республиканың девискээринде 11 чаа школа тудуу болгаш 13 школаның капитал септелге ажылдары кидин түлүк. Ында хөй кезиинде Тываның тудуг техникумунуң сургуулдары хаара туттунган.
Оон ыңай, ук техникумнуң 3 сургуулу «Россияның сургуулдар отрядтары» аныяктарның бүгү-россия чергелиг хөй-ниити организациязының Тывада регион салбырының «Алдын холдар» деп сургуулдарның тудуг отрядының составында, 3 кижи Иркутск облазында Россияның «Сибирьниң күжү» газ четкизиниң магистралының тудуг ажылдарында киржип турар. Тудуг техникумундан 2 сургуулду база көдээ ажыл-агый техникумундан 1 сургуулду Камчаткаже, балык аштаар ажылдарже чоруткан.
«Сургуулдарның отрядтарынга ажыл аныяк-өскенниң медерелдиг, харыысалгалыг болгаш эптиг-демниг болурунга дузалаар. Ол ышкаш аныяктарга чаа эш-өөр-биле таныжып, арга-дуржулга солчуп, командага ажылдап өөрениринге ажыктыг. Шак мындыг төлевилелдерге киржип чоруур сургуулдар кедизинде ниитилелди эки талазынче өскертиринге үлүг-хуузун киириштиреринге белен идепкейжи хамаатылар болгаш лидерлер болур» — деп, сургуулдарның отрядтарының удуртукчулары бүзүрелдии-биле демдеглеп турар.
Тываның күрүне университединиң баазазында «Россияның сургуулдар отрядтары» аныяктарның бүгү-россия чергелиг хөй-ниити организациязының Тывада регион салбыры ажылын чорудуп турар. Ында республиканың ортумак болгаш дээди өөредилге черлериниң 300 хире сургуулдары бүрүткеттинген. Көдээ ажыл-агый, башкылаашкын, ачы-дуза чедирер, тудуг ажылдары дээн ышкаш янзы-бүрү угланыышкыннарга ажылдаар аргаларны сургуулдарга отрядтарның башкылары тургузуп турар.
Алиса ДОНГАК.
"Шын" №51, 2023 чылдың июль 12.