Бо чылын республиканың ниити өөредилге школаларын 63 доозукчу, Кызылдың Президентиниң кадет училищезин 18 кадет алдын медальдар-биле дооскан. Тываның Өөредилге яамызы ооң дугайында дыңнаткан. Эрткен чылда республикада оон ийи катап эвээш, азы 44 кижи тергиин демдектерлиг дооскан турган.
Июнь 24-те регионнуң шупту школаларынга доозукчулар кежээлери болуп эрткен. Школазы-биле 2041 он бирги классчылар байырлашкан. Өөредилге яамызының сүмелээни езугаар, доозукчулар кежээлерин үени сагып эрттирген.
Ол хүнде, ниитилел билиглеринге чаңгыс аай күрүне шылгалдаларының түңнелдерин чарлаптарга, ол эртемде эң-не хөй санны алган ийи өөреникчи билдинип келген. Кызыл хоорайның школаларындан ийи өөреникчи: 7 дугаар школаның башкызы Марина Брониславовна Янушкевичиниң белеткээни доозукчузу Айдасай Начын, база 5 дугаар хоорай гимназиязының башкызы Омаа Ивановна Монгуштуң доозукчузу Аюш Кужугет болган. Олар ниитилел билиглеринге 100 баллды алган Тывада бир дугаар доозукчулар болган. Ынчангаш бо чылдың шылгалда кампаниязында республикадан чүс баллдыг чеди доозукчу бар.
Ооң мурнунда чаңгыс аай күрүне шылгалдаларын 100 санга беш кижи дужааган деп дыңнатканын сагындыраал. Кызылдың 15 дугаарлыг лицейинден бир, Кызылдың Президентиниң кадет училищезинден дөрт кадет тергиин эки дужааган. Олар орус дыл болгаш география шылгалдаларынга эки билиглиин бадыткаан.
Школачылар бо чылын химия, биология, орус дыл, математика, физика, литература эртемнеринде эки белеткенгенин көргүзүп, ол эртемнерде улуг демдектерлиг өөреникчилер саны көвүдээнин Өөредилге яамызы демдеглээн.
