Хадыыр-сарыгдан кылган варенье амданы, өңү, тургузуу-биле ары чигири сагындырар. Ону «цыганнар вареньези» азы «хадыыр-сарыг мёду» деп база адаар.
Херек чүүлдер: 200 гр хадыыр-сарыг чечээ, 600 гр чигир, 0,5 литр суг, 0,5 бичии шопулак ишти лимон кислотазы.
Кылыры: хадыыр-сарыгның чечектерин аяс хүнде чыыр. Чүгле частып келген сарыг, хоюг чечектерни чыгза эки.
Хадыыр-сарыгның сывында ажыг, ак сүт бар. Ол ажыг амданны чидирерде 24 шак дургузунда сугга тургузуптар. Өске аргазы база бар: хачы-биле чечээниң чүгле сарыг бүрүлерин (лепесток) кезип алыр.
Хадыыр-сарыгның эм шынарын чидирбес дизе, чулуп алган чечектерни чугбайн, сугну куткаш, оожум отка хайындырар. Хайны бээрге, эң-не кол холуксаа — лимон кислотазын немээр. Ол вареньениң чараш сарыг өңүн быжыглаар, чигирни кристалдаттырбас. 30 минута хайындырган соонда, отту өжүргеш, 1 шак тургузар.
Ийи каът марля өттүр чечектерни сызып, эки шүүрээр. Чигир немээш, отка салыр. Чигирин хоюдур эки булгаар. Вареньени 30 минута хайындырар. Стерилизастаан банкаларже варенье изиг турда кудар.
Хоюг, кылагар сарыг өңнүг варенье ары чигиринден ылгал чок боор.
«Шын» №36 2024 чылдың май 18