Россияның Маадыры Буян Куулар:
– Үдеп турар чылывыс мээң амыдырал-чуртталгамга кончуг ужур-уткалыг чыл болду. Ооң мурнунда ИХЯ-га опер төлээзи болуп ажылдап чордум. 2023 чылда РФ-тиӊ Кургаг чер шериглериниӊ 55-ки гвардейжи мото-адыгжы (даг) бригадазынга керээ езугаар ажылдап кирип алдым. 2024 чылда "Россияның Маадырының Алдын Сылдысты" алыр аас-кежиктиг болдум. Ол болуушкун чүгле 2024 чылдың эвес, а бүгү чуртталгамның улуг болуушкуну деп санаар мен.
Ийиде, сентябрьда ТР-ниң Дээди Хуралының (парламентизиниң) дөрткү чыыжының депутаттарының соңгулдаларынга киришкеш, тиилээш, дайынчы эш-өөрүм-биле кады дайынчы хүлээлгелерим күүседир дээш, депутаттавайн бардым. Соңгулдага киржири база улуг болуушкун деп бодаар-дыр мен.
Ынчангаш 2024 чыл меңээ чедиишкинниг чыл болган деп түңнээр-дир мен. Чаа чылдың бүдүүзүнде чаңгыс чер чурттугларымга болгаш кады дайылдажып чоруур эш-өөрүмге чедиишкиннерни күзедим!
“Шын” №100 2024 чылдың декабрь 28