Екатеринбург хоорайның 300 чыл оюн демдеглээн хүнде, август 19-та, Бүгү-делегейниң университет спортунуң фестивалы эгелээн. Ында 37 чурттан спортчулар киржип турар — Казахстан, Кыргызстан, Узбекистан, Беларусь, Кыдат Улус Республика, Аргентина, Армения, Бангладеш, Бразилия, Гватемала, Иран, Мексика, Сербия болгаш өске-даа.
Россияның 42 субъектизинден 81 дээди өөредилге черлериниң командалары киржип турар. Чижээ, Москвадан — 11, Санкт-Петербургтан — 9, Свердловск облазындан 6 дээди өөредилге чери киржип турар. Ол ышкаш Венесуэла, Вьетнам, Зимбабве, Индонезия, Куба, Нигерия, Пакистан, Танзания, Уганда, Шри-Ланка болгаш Эквадордан спортулар чиик атлетикада киржип турар.
Ниитизи-биле делегейниң беш дивинден чыглып келген студентилер аразынга спортчу фестиваль август 31-ге чедир уламчылаар.
Бо фестивальда спорттуң аңгы-аңгы хевирлеринге маргылдаалар аразында Кежик биле Чаяан Монгуш алышкылар хостуг хүрешке Тываны төлээлеп киришкеш, алдын биле мөңгүн медальдарны чаалап алган.
К. МОНГУШ.
Чуруктарны интернеттен алган.
"Шын" №64 2023 чылдың август 30