2025 чылдың январь 1-ниң байдалы-биле республиканың бүгү көдээ ажыл-агыйларынга ниити саны 429,6 муң төрүүр шээр мал бар турган. Ооң 323,8 муңу – хой, 105,8 муңу – өшкү. Олардан өске 77,2 муң баш инек база 43,8 муң баш бе бар бооп турар.
Бо чылдың май айның ийиги чартыында республиканың көдээ ажыл-агыйларында 322,3 муң баш хураган болгаш анайлар төрүттүнген. Ол дээрге шээр малдың чаш төлүн камгалап алырының планын республика 107 хууга күүсеткени ол.
Анай-хураган камгалап алырының планын сес кожуун ажыр күүсеткен:
Таңды кожуун — 146 хуу азы 10,4 муң баш;
Бии-Хем — 131 хуу азы 12,1 муң баш;
Чаа-Хөл — 131 хуу азы 9,0 муң баш;
Кызыл — 118 хуу азы 37,4 баш;
Сүт-Хөл — 117 хуу азы 27,9 муң баш;
Чөөн-Хемчик — 116 хуу азы 26,1 баш;
Мөңгүн-Тайга — 114 хуу азы 20,3 муң баш;
Өвүр — 108 хуу азы 20,8 муң баш.
Бызаалар болгаш кулуннар ажаап алыры база хоомай эвес болган деп чугаалап болур. 50,0 муң баш бызааны камгалап алган, планнаттынганының 81,0 хуузу. 24,2 муң баш кулун амгы үеде онча-менди доругуп турар, планның 79,1 хуузу.
Төрүүр инектерден бызаалар ажаап алырының планын ийи кожуун ажыр күүсеткен: Сүт-Хөл кожуунда 4,2 муң баш бызаа – планның 109 хуузу, Тере-Хөлде 1,1 муң баш – планның 100 хуузу.
Белерден кулуннар ажаап алырының планын Сүт-Хөл кожуун 109,9 хууга күүсет- кен — 1,6 муң баш кулунну алган. Чөөн-Хемчик 104,7 хууга — 2,1 муң баш кулун, Кызыл кожуун 102 хуу күүсеткен — 4,0 муң кулун.
Амгы үеде кол сорулга – чаш мал-маганны чидириг чок доруктуруп өстүрери. Бо частың агаар-бойдузу соок, хат-кавыскылыг болгаш, чаш малды доруктур азырап өстүрери малчыннарга белен эвес бооп турар.
Чаш малдың ишти-хырны сырынгылап аарый бээриниң таварылгалары бар-даа болза, халдавырлыг аарыглар илереттинмээн.
Ш. ЛОПСАН.
Чурукту интернеттен хоолгалаан.
«Шын» №22 2025 чылдың июнь 12