Тыва улус шаг шаандан бээр хүндүлежир, арай шыдал чок, кырган-дижең азы хөй ажы-төлдүг төрелдерин кээргээр, чүү херек болур дузалажыр чораан. Амгы үеде-даа дузаның кандыг-даа хевирлери бар, ону кылып чоруур улус улуг буян чедип ап чоруур, аас-кежиктиг кижилер-дир. Тыва чурту сайзырап өзүп турар. Аныяк-өскен эртем-билигни чедип ап, чуртувусту, чонувусту алдаржыдып турарынга чоргаарланып ханмас мен. Эртемденнер немежип тур, Ада-чуртун камгалаан эрес-дидим маадырларывыс база хөй. Дээди эртемниг аныяк эмчилер янзы-бүрү берге кезиишкиннерни Тывада кылып турар апарганы өөрүнчүг. Талантылыг аныяктарывыс дээди шаңналдарны ап турлар. Спорт талазы-биле шуут онзагай, чеже-чеже алдын, мөңгүн медальдарны Тывазынче эккеп турар-дыр. Ынчангаш «Чоргаар, байлак төрээн Тывам» деп ырлажып турары-даа чөп.
Автобуска чорааш, эскергеним, аныяктар кырганнарга олуттарын чайлап бээрлер, а чамдык улуг улус «четтирдим-даа» дивейн, анаа-ла олуруп алырлар. Хүндүткел-биле «четтирдим» деп чугаалаарга, ол сөстүң чаражын, олудун чайлап берген кижиниң сеткили ханар, мен база эки чүвени кылдым деп бодал-биле амыраар.
Бир катап автобуска өөреникчи бичии уруглуг улгады берген херээжен кирип келгеш, уруун «Сен бо сандайга олуруп ал. Аарып турар уруг-дур ийин» — дээш, боду чанынга туруп алды. Бир доктаам эрткен соонда, база бир угбай кирип келгеш: «Сен тур» — дээш, уругну тургузупкаш олуруп алды. Демги угбай аас-дыл үндүреринден түвексинген боор, чүнү-даа чугаалавайн, уруунуң чанынга турду. Бичии-даа кижи болза, чөптүү-биле айтырып, дилеп алыр болза, ындыг эпчок байдал болбас турган. Чамдык аныяктарывыс улуг улус кирип кээрге, телефон көрүп, көрбээчеңнеп база олургулаар. Ол дээрге биче сеткил, сагыш човаачал эвес чорук-тур ийин. Тыва улус анаа эвес «Кижи болуру чажындан» деп чугаалаан болгай. Ол сагыш човаачал аныяктарның келир үези база-ла чырык чаагай болуру чугаажок. Ынчангаш улуг-бичии дивейн, бот-боттарывыска камныг, хүндүлежип чоруулуңарам.
/ Д. МОНГУШ, күш-ажылдың хоочуну.
“Шын” №12 2026 чылдың апрель 2
"Шын" солуннуң МАХ-каналынга каттыжыңар https://max.ru/join/egenQjfuGzdL6mt0tSEaIo13rmlpMRQzzSnZQdqfHFY