Россия Федерациязының Президентизиниң Сибирь федералдыг округта бүрүн эргелиг төлээзиниң сайтызында ол медээни салган. Ында Ада-чурт камгалакчызының хүнү ыдыктыг чүүлдерге үндезилеттинген: Ада-чуртка шынчы ынакшыл, ооң төөгүлүг оруунга шынчы чорук база айыыл чок чоруктуң болгаш чечектелиишкинниң адынга бараан болурунга беленин, эрес-дидим болгаш маадырлыг чорукту, Ада-чурттуң, өг-бүлезиниң болгаш чоок кижилериниң мурнунга эң-не бедик харыысалганы илередип турар деп бижээн.
"Бөгүн бис Тиилекчилерниң салгалын – Ада-чурттуң Улуг дайынының хоочуннарын онза өөрүп четтиргенивис-биле сактып тур бис. Оларның деңнеп четпес маадырлыг чоруу, тура-соруу, бодун хайыравазы салгалдарга кезээ мөңгеде мөзү-шынар үлегери болуп артар. Бо эрес-дидим, коргуш чок дайынчылар Төрээн чуртун болгаш ооң кызыгаарларын камгалаары-биле туржуп, тус чер чөрүлдээлерин чавырылдырарынга база онза байдалдарда кижилерниң амы-тынын камгалаарынга маадырлыг чоруун болгаш бодун хайыравазын көргүскеннер.
Амгы үеде Россияның шериг албанныглары чурттуң бот-догуннаашкынын болгаш национал сонуургалдарын камгалап, адаларының, кырган-ачаларының, өгбелериниң алдарлыг чаңчылдарын чоргаарал-биле уламчылап, эрес-дидим болгаш чайгылыш чок быжыг туружун көргүзүп чоруур. Өгбелериниң чагыын эдерип, Россияның хамаатыларының тайбың амыдыралын камгалап, төөгүлүг чөптүг чорукту эгидип турар.
Бистиң чуртувустуң күчү-күжү – хөй националдыг чонунуң чаңгыс деминде. Бистиң ниити төөгүвүстү болгаш ниити үнелиг чүүлдеривисти хүндүлээринге үндезилеттинген төрээн чуртка ынакшыл чоннар аразында эптежилгениң, демнежилгениң болгаш найыралдың күштүг үндезини болуп турар. Сибирьниң чоннарының онзагай чаңчылдарын болгаш культуразын камныг кадагалап тургаш, Россия Федерациязының бай-байлаан болгаш күчү-күжүн бедидер бис.
Күрүне баштыңының чарлааны Россияның чоннарының чаңгыс деминиң чылы бистиң төрээн черивис дээрге, кандыг-даа шаптараазыннар тургустунуп келзе, бот-боттарывысты хүндүлежип, ниити сорулгаларывыс-биле каттышкан чаңгыс ниити салым-чолувусту көргүзүп турар. Бистиң тиилелгевистиң үндезини шак ол чаңгыс демниг чоруувуста!» - деп, Анатолий Серышевтиң байыр чедириишкининде бижээн.
Россия Федерациязының Президентизиниң Сибирь федералдыг округта бүрүн эргелиг төлээзи бүгү сибирьжилерге быжыг кадыкшылды, чечектелиишкинни, салдынган сорулгаларын чедип алырын, амыр-тайбыңны, келир үеже бүзүрелди күзеп, «Байырлал-биле! Ада-чурттуң камгалакчызының хүнү-биле! " деп сөстер-биле байыр чедириишкинин дооскан.