Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Новосибирск хоорайда кассациялыг шериг судунга четкен. Бүрүн эргелиг төлээ суд эргелелиниң ажыл-чорудулгазы-биле таныжып, судтуң даргазы Александр Краскога албан-хүлээлгениң шынзыдылгазын тывыскан.
Кассациялыг шериг суду 2019 чылдың октябрь 1-де тургустунганындан бээр, судьялар 37 муң ажыг херекти сайгарган деп, Александр Краско бүрүн эргелиг төлээге чугаалаан. Суд 104 гарнизон шериг судтарының, оларның 5-и Россия Федерациязындан дашкаар черлерде, 9 округ (флот) шериг судтарының болгаш апелляциялыг шериг судтарының хоойлу езугаар күшче кирген суд актыларынга удур хомудалдар болгаш билдириишкиннер талазы-биле херектерни сайгарып турар.
Бүрүн эргелиг төлээ Россия Федерациязының Президентизи 2025 чылдың январь 16-да ат салганы чарлыы езугаар Кассациялыг шериг судунуң даргазы албан-дужаалга катап томуйлааны-биле Александр Краскога байырны чедирген. Тускай шериг операциязының үезинде кассациялыг шериг судунуң көргүскен турум болгаш бедик шынарлыг ажылы онза ужур-уткалыг деп, бүрүн эргелиг төлээ демдеглээн.
«Шериг албанныгларның херээн сайгарып тургаш, чүгле эрге-хоойлу талаларын эвес, а амыдыралының тускай байдалдарын база кичээнгейге алыр херек дээрзин күрүне Баштыңы чаңгыс эвес удаа чугаалаан» — деп, Анатолий Серышев суд коллективиниң ниити хуралында илеткелинге онзалап демдеглээн. Шериг албанныгларның болгаш оларның өг-бүлелериниң эргелерин камгалаарынга эң-не кичээнгейлиг болурун дилеп тур мен деп, ол немээн.
Александр Адамович Краско Россияның Президентизиниң 2019 чылдың февраль 8-те 40 дугаарлыг Чарлыы-биле Кассациялыг шериг судунуң даргазының албан-дужаалынга бир дугаар томуйлаттынган. Россия Федерациязының Камгалал яамызының Шериг университединиң “юриспруденция” мергежилин 1997 чылда тергиин демдектерлиг дооскан.
Ол Новосибирск гарнизонунуң шериг судунуң судьязы, Новосибирск гарнизонунуң шериг судунуң даргазының оралакчызы, ол ышкаш Барыын-Сибирьниң округ шериг судунуң даргазының оралакчызының болгаш даргазының албан-дужаалдарын күүседип турган. 2022 чылдың декабрьда Х Бүгү-россияның судьялар съездизинге Россия Федерациязының Судьялар чөвүлелиниң даргазының оралакчызынга соңгуткан.