Сибирь федералдыг округта Россия Федерациязының Президентизиниң бүрүн эргелиг төлээзи Анатолий Серышев Новосибирск облазының чурттакчыларынга күш-ажылынга болгаш хөй-ниити ажыл-чорудулгазынга чедиишкиннерни көргүскени дээш күрүне шаңналдарын болгаш Президентиниң шаңналдарын тывыскан.
Бүрүн эргелиг төлээ улуг ужур-уткалыг күрүне байырлалдарның бирээзи-биле чыылганнарга байырны чедирген. Россия Федерациязының Үндезин хоойлузу шилиттинген оруу-биле бурунгаар шимчеп олурар бот-догуннаан күрүнеге чурттаар эргени хамаатыларга быжыглаанын ол демдеглээн.
«Бистиң Төрээн чуртувустуң хөгжүлдезинге бузулбас үндезинни тургузуп, ниитилелдиң төөгүзүн уламчылап, российжи күрүнениң таваан быжыглаар дээн ышкаш чугула чүүлдерни боттарының күш-ажылы-биле чедип алган кижилерге өөрүп четтириишкинниң онза сөстерин илереттим» – деп, бүрүн эргелиг төлээ чугаалаан.
«Новосибирскиниң кылымал удазын заводу» акционерлиг ниитилелдиң коллективи күш-ажылчы чедиишкиннери болгаш хөй чылдарда ак сеткилдиг ажылы дээш Александр Невскийниң ордени-биле шаңнаткан. Бүрүн эргелиг төлээ бүдүрелгениң чиңгине директору Глеб Вареницага күрүне шаңналын дамчыдып тура, Россияның камгалал күжүн быжыглаарынга заводтуң ажылдакчыларының киирген улуг үлүг-хуузу дээш четтиргенин илереткен.
Новосибирск облазының Хоойлужудулга Хуралының даргазы, күрүне ажылдакчызы Андрей Шимкив хоойлужудулга ажыл-чорудулгазынга хөй чылдарда ак сеткилдиг ажылы болгаш идепкейжи чоруу дээш Найырал орденин бүрүн эргелиг төлээниң холундан алган. «Хоорайның 1 дугаар клиниктиг поликлиниказы» күрүнениң автономнуг кадык камгалал албан чериниң кол эмчизи Сергей Дорофеевке кадык камгалал адырынга ачы-хавыяазы болгаш хөй чылдарда ак сеткилдиг ажылы дээш Пироговтуң орденин тывыскан.
Байырлыг езулал үезинде Ольга база Роман Прачуктар болгаш Любовь база Егор Трушкиннерниң өг-бүлелеринге “Ада-иениң алдары” орденниң медальдарын тывыскан. Бо өг-бүлелер беш база дөрт ажы-төлдү кижизидип өстүрүп турарлар. Бүрүн эргелиг төлээ күрүне шаңналдарын тыпсып тура, хөй ажы-төлдүг ада-иелер чаңчылчаан сагыш-сеткил база мөзү-бүдүштүң үнелиг чүүлдерин кадагалап арттырарынга чижекти, аныяктарга чараш үлегер болганын демдеглээн.
Анатолий Серышев регионнуң улуг үлетпүр бүдүрүлгелериниң база өөредилге адырының ажылдакчыларынга «Ада-чурт мурнунга ачы-хавыяазы дээш» орденниң II чергезиниң медальдарын тывыскан.
«Россия Федерациязының кадык камгалалының алдарлыг ажылдакчызы» база «Россия Федерациязының алдарлыг эмчизи» хүндүлүг аттар-биле кадык камгалалының ажылдакчыларын демдеглээн. Регионнуң ниити өөредилге школаларының беш башкызынга «Дагдыныкчы ажылы дээш» хөрек демдээн, үш башкыга «Россия Федерациязының алдарлыг башкызы» хүндүлүг аттарны тывыскан. Бүгү-российжи чогаадыкчылар болгаш рационализаторлар ниитилелиниң Новосибирск облазында хөй-ниити организациязының кежигүнү Иван Безбородов «Россия Федерациязының алдарлыг чогаадыкчызы» хүндүлүг атка төлептиг болган.
Россия Федерациязының Президентизиниң өөрүп четтириишкин база хүндүлел бижиктери-биле он кижини демдеглээн. Бүрүн эргелиг төлээ шаңнатканнарның чедиишкиннеринге бедик үнелелди берген. «Кады ажылдап турарыңар кижилерге, коллективиңерге, чоок улузуңарга өөрүп четтириишкинниң сөстерин илередип тур мен. Оларның деткимчези-биле мындыг улуг чедиишкиннерни чедип алган силер» – деп, байырлыг езулал үезинде бүрүн эргелиг төлээ чугаалаан.
