Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Москвага ажылчын сургакчылаашкынының үезинде Россияның Хамааты камгалал, онза байдалдар болгаш айыыл-халаптарга удур демисел яамызының коллегиязының улуг хуралынга киришкен.
Хуралга ведомствонуң 2025 чылда ажыл-чорудулгазын түңнеп, чоокку үениң кол айтырыгларын тодараткан. Сибирьниң регионалдыг ведомстволарының болгаш округтуң федералдыг субъектилериниң эрге-чагырга органнарының демниг ажылының ачызында эрткен чылын улуг суг үери болгаш улуг арга-арыг өрттери болбаан. 2024 чылга деңнээрге, өрттер 4,1 катап эвээш, азы 81,1 муң га арга-арыг өрттенген. Арга-арыг өрттериниң 74 хире хуузун баштайгы хонуунда өжүрүп, хову өрттериниң 95 хуузун чок кылган. Өрттерниң хөй кезии кижиниң буруузу-биле хып үнген.
Чыл дургузунда округ федерациязының субъектилеринге суг үерлерин болдурбас талазы-биле системалыг ажылдаан. Гидротехниктиг тудугларның айыыл чок чоруун хандырарынче база суг объектилеринде ээзи чок инженер тудугларны тодарадырынче онза кичээнгейни угландырган. Сөөлгү беш чылда октаттынган гидротехниктиг тудугларның саны 203-тен 58 чедир эвээжээн, оларның 36-зы Красноярск крайда турар. Амгы үеде ээзи чок гидротехниктиг тудугларның көвей кезииниң айыыл чок чоруун хандырар хемчеглер планнарын тургускаш бадылаан, а артканнарында ажылдар уламчылап турар.
Бо чазын Сибирьде хар эрте эрип эгелээрин эксперттер баш бурунгаар сагындырып турар. Ынчангаш өрт айыылының болгаш суг үериниң сезонунга баш бурунгаар белеткенирин бүрүн эргелиг төлээ дыңнаткан. Өрттерни болдурбазы-биле 170 агаар суднолары агаардан мониторингилээр болза, округтуң чеди регионунда чер кырындан өрт илередир «Лесохранитель» деп автомат системаларны тургускан, 292 камера дамчыштыр хайгаарал чоруп турар. Гидрологтуг байдалды хайгаараар кылдыр 548 гидропостуларны база түр үеде суг хемчээр 420 хире постуларны ажыдары планнаттынган.
Коммунал четкилер эргижиреп элээнинден ында озал-ондактар саны көвүдеп турары-биле, оларны болдурбазынче болгаш ооң уржуктарын чайладырынче онза кичээнгейни угландырар херек деп бүрүн эргелиг төлээ чугаалаан. Ооң бир көскү чижээ, Иркутск облазының Бодайбо хоорайга болган озал-ондак — суг хоорзазы доңганындан дөрт котельнаяның ажылы турупкан. Бүрүн эргелиг төлээ айыыл-халаптың уржуун чайладырын бодунуң хайгааралында алган – байдал канчап турарын хүннүң-не дыңнадып турар, бүрүн эргелиг төлээниң оралакчызы Вадим Головко аңаа ажылдаан.