Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев Москвага ажылчын сургакчылаашкын үезинде Россияның Чаңгыс аай энергетика системазының операторунуң Кол диспетчер төвүнге чедип, «СО ЕЭС» АН-ның баштаар чериниң даргазы Фёдор Опадчий-биле ажылчын ужуражылганы эрттирген.
Анатолий Серышев Россияның энергетика системазының оперативтиг-диспетчер башкарылгазын хандырар диспетчер залын көрген. Бүрүн эргелиг төлээниң кол кичээнгейи энергетика системазының хөгжүлдези бооп арткан. Бүрүн эргелиг төлээ четки компанияларының удуртукчулары-биле ээлчеглиг ажылчын ужуражылгалар болгаш хуралдар үезинде адырның элээн чидиг айтырыгларын сайгарып турар. «СО УЭС» АН-ның баштаар чериниң даргазы Фёдор Опадчий-биле Россияның энергетика системазын хөгжүдериниң планнаашкынын, Сибирьде электри энергиязынга негелдениң өскенинге баш бурунгаар санаашкын айтырыгларын чугаалашкан.
Сибирь федералдыг округта генерация күчү-күжүн чаартыры болгаш эде тудары, регионда чаа суг электри станцияларын тударының перспективалары, 2030 чылдарга чедир Сибирьниң энергетика системазының турум ажылдаарын бедидер хемчеглерни алырын база макрорегионга алызында чаа гидроэлектростанцияларны тударын чугаалашкан. Россияның энергетика системазының бүзүрелдиг ажылдаар база онза байдалдарны болдурбас болгаш чайладыр системаларының ажылдаарының ниити принциптерин хандырарынче онза кичээнгейни угландырган.
Бүрүн эргелиг төлээ электри энергиязы болгаш ооң күчү-күш рыногун ажылдадырын, ол ышкаш энергия чедишпес черлерде криптовалюта майнингизин кызыгаарлаар хемчеглерже кичээнгейни угландырып турар. Анатолий Серышевтиң бодалы-биле алырга, экономиканы өстүреринге генерация күчүзүн улгаттырары дорт харылзаалыг. Энергетика адырын хөгжүдери чурттуң иштики каттышкан продукциязын улгаттырып, кижилерниң амыдырал-чуртталгазының шынарын экижидер ужурлуг деп ол санаан.
«Бистиң ниити сорулгавыс – экономиканың болгаш чурттакчы чоннуң өзүп орар хереглелдерин үе-шаанда чедимчелиг хандырар дээш, энергетика системазының дүрген хөгжүдерин хандырары болур. Генерация күчү-күжүн тудар болгаш эде чаартыр, чаа технологияларны ажыглалче киирер-даа чаа төлевилел-ле Россия Федерациязының Президентизиниң ол стратегтиг сорулгазын чедип алырынга улуг үлүг-хууну киирер ужурлуг» - деп, хурал соонда Анатолий Серышев онзалап демдеглээн.
Бүрүн эргелиг төлээ «СО ЕЭС» АН-ның салбырлары – «Сибирьниң энергетика системазының каттышкан диспетчер төвүнүң» база федерация округунуң шупту 10 субъектизиниң, а ол ышкаш Бурят Республика биле Забайкалье крайның, энергетика системаларынга оперативтиг удуртулганы хандырар Новосибирскиниң регионалдыг диспетчер төвүнүң чаа тудуг комплекизинге чедип чораанының соонда, үр болбаанда «СО ЕЭС» АН-че үнүүшкүннү кылган. Сибирьниң энергосистемазының каттышкан диспетчер башкарылгазының оперативтиг зоназынче технологтуг аңгы Таймырның Долган-Ненец, Турухан районнарның база Красноярск крайда Норильск хоорайның электроэнергетика системазы кирип турар.
Тайылбыр:
«СО ЕЭС» АН (Система оператору) — Россияның Чаңгыс аайлаан энергетика системазында база 100 хуу күрүне капиталы-биле технологтуг аңгылаан территориалдыг энергетика системаларында төпчүткен оперативтиг диспетчер удуртулгазын чорудуп турар тускай организация.