Россия Федерациязының Президентиниң Сибирь федералдыг округта бүрүн эргелиг төлээзи Анатолий Серышев Томск облазынга ажылчын сургакчылаашкынын дооскан. Дүүн бүрүн эргелиг төлээ элээн каш ажылчын ужуражылгаларны эрттирген.
Томск облазының губернатору Владимир Мазур-биле ажылчын ужуражылганың кол темазы сооктар үезинде чуртталга-коммунал комплекизиниң ажылын хандырары болган. Томск облазында амыдырал-хандырылга, ооң иштинде электри четкизиниң, чылыдылга шугумнарының, суг хандырылга системазының объектилери доктаамал ажылдап турарын регионнуң губернатору бүрүн эргелиг төлээге илеткээн. «Дыңзыг сооктар үезинде чонга чылыг болгаш изиг суг турар кылдыр, кандыг-даа онза байдалдар тургустунуп кээрге, ону дарый шиитпирлээр апаар» - деп, бүрүн эргелиг төлээ айыткан.
Тускай шериг операциязының киржикчилерин болгаш хоочуннарын база оларның өг-бүлелерин деткииринче онза кичээнгейни угландырган. Владимир Мазур бүрүн эргелиг төлээге шериг албанныг кижилерге социал адаптация, ооң иштинде ажылга хаара тударынга, эде өөредиринге, боттарының ажыл-херээн ажыдарынга дузалаар программалар ажылдап турарын дыңнаткан.
Национал төлевилелдер күүселдезин база аңгы чугаалашкан. Чижээ, «Аныяктар болгаш уруглар» национал төлевилелдиң күүселдези-биле эрткен чылын Томск облазында 39 школа септеттинген. Бо чылын 35 школаны база бир уруглар садын чаартыры планнаттынганын Владимир Мазур Анатолий Серышевке дыңнаткан.
Томск облазының Хоойлужудулга Думазының даргазы Оксана Козловская-биле ужуражылга үезинде, регионда ЭКГ - рейтинг аргаларын практика кырынга ажыглап турарын чугаалашкан. Томск облазы ажыл-агыйжы эрге-байдал индекизин киирер дугайында хоойлуну хүлээп алган федералдыг округ субъектилерниң бирээзи болган.
«Ол сорулгаларны чедип алырынга улуг рольду бизнес ойнап турар, ынчангаш ону эрге-чагырга органнары деткиир ужурлуг» - деп, бүрүн эргелиг төлээ чаңгыс эвес катап айыткан. Ол кады ажылдажылгага элээн дээштиг аргаларының бирээзи кылдыр ЭКГ - рейтингини айыткан. Амгы үеде Сибирьниң шупту регионнарында ол стандартты киирер дээш, эрге-хоойлу баазазын идепкейлиг ажылдап кылып турар.
Томск облазында хүлээп алдынган хоойлу социал харыысалгалыг компанияларга тургустунган айтырыгларны дарый шиитпирлээр арганы берип турар. Эксперттерниң түңнээни-биле алырга, бизнестиң идегелдиин үнелээринге дузалаар кол арга болуп, ажыл дилеп турар улуска ажылды шилип алырынга ол идиглиг. Кадрлар чедишпес үеде бизнес чорудулгазынга харыысалгалыг компаниялар күш-ажыл рыногунга бодунуң чижилгезин ынчан элээн бедидер.
Бүрүн эргелиг төлээ «Газпром трансгаз Томск» КХН-ниң чиңгине директору Владислав Бородин-биле база ужурашкан.
Компанияның директорунуң чугаазы-биле алырга, бүдүрүлге Уралдан Камчаткага чедир 15 регионда газ шугуму дамчыштыр газты сөөртүп, Сибирьде болгаш Ыраккы Чөөн чүкте улуг энергетика объектилерин болгаш үлетпүр бүдүрүлгелерин газ-биле хандырып турар. Бүрүн эргелиг төлээ газ сөөртүр системаның үзүктел чок ажылынче онза кичээнгейни салган.
Ужуражылга үезинде Сибирь регионнарынче газты киирериниң алыс кедизин база «Бүдүрүлге херекселдери болгаш автоматизация» национал төлевилелди боттандырарынга бүдүрүлге чорудуунуң ролюн аңгы чугаалашкан. Владислав Бородинниң чугаазы-биле алырга, «Газпром трансгаз Томск» инновациялыг робот системаларын идепкейлиг ажыглап, сөөртүлгениң шупту чадаларында ооң дээштиин бедиткен.
Томскунуң бүдүрүлгелеринге даштыкы барааннарны солуурунуң болгаш технологтуг хөгжүлдениң айтырыгларын шиитпирлээриниң аргаларын, ооң иштинде «Томск облазының электрониказы болгаш ужудукчу чок технологиялары» үлетпүр кластериниң иштинде инновация продукциязын чогаадырынга болгаш ажыглаарынга киржир планнарны база чугаалашкан. Бо угланыышкын регионнуң база бүгү Сибирьниң бедик технологияларлыг адырларын хөгжүдеринге база бүдүрүлге баазазын быжыглаарынга чаа аргаларны ажыдып турарын бүрүн эргелиг төлээ демдеглээн.