Март 25-те Аныяктар ордузунга Тываның аныяк соңгукчулар клубтарының II республика чергелиг шуулганы болуп эрткен.
Тываның Соңгулда комиссиязының даргазы Лариса Андалаева шуулганның киржикчилеринге байыр чедиргеш, тиилелгени күзээн.
Школачыларга Тываның соңгулда системазының 30 чыл оюнга тураскааткан дириг чурукту көргүскен. Хемчегни өзүп орар салгалдың эрге-хоойлу культуразын болгаш хамааты идепкейжизин бедидери-биле организастап эрттирген.
Кызылда президентиниң кадет училищезиниң кижизиттирикчилери, ТР-ниң күрүне лицейиниң, П.А. Морозов аттыг аграр лицейиниң, Кызылдың 5 дугаар гимназиязының, 11 дугаар школазының, Каа-Хем суурнуң Т.Б. Куулар аттыг ийи дугаар болгаш бир дугаар ортумак школаларының өөреникчилери соңгулда хоойлузунуң болгаш чорудулгазының дугайында айтырыгларынга оюн үезинде харыылап, билиглерин хынааннар.
Кызылдың 5 дугаар гимназиязының командазы шылгарап үнгеш, шуулганның тулган чемпионнары болган.
Кызылдың 11 дугаар школазының өөреникчизи, чалыы корреспондент Константин Некрасовтуң чугаазы-биле алырга, оларның командазы шуулганга ийи неделя бурунгаар белеткенип эгелээн. Ол Тываның соңгулда системазының төөгүзүн көргүскени онза солун болганын демдеглээн.
Аныяктарның соңгулда комиссиязының даргазы Айдың Шивидек ук шуулганны чыл санында эрттирерин дыңнаткан.
Тываның А.С. Пушкин аттыг национал ном саңы “Соңгулдалар – уругларның көрүжү-биле” деп делгелгени кылган.
А.Б. Чыргал-оол аттыг Кызылдың уран чүүл колледжизиниң үрер-хөгжүм оркестриниң артистери аян тудуп, шуулганның киржикчилериниң хей-аъдын улам-на көдүрген.
Тываның соңгулда системазының төөгүзү ХХ чүс чылдарның 20 чылдарда эгелээн. Ооң тургузуушкуну болгаш сайзыралы республика хөгжүлдезиниң төөгүзү-биле сырый харылзаалыг. Тывага соңгуур эргелерни 1921 чылда бир дугаар киирген. Ынчан эр болгаш херээжен 20 хардан өрү назылыг хамаатылар соңгуур болза, шажын ажылдакчыларының база назылап кыраан улустуң соңгуурун кызыгаарлаан турган.
Эрткен үжен чылдарның иштинде республикада үш муң ажыг соңгулда кампаниялары эрткен. Бөгүн Тываның соңгулда комиссияларының системазынче – Тыва Республиканың Соңгулда комиссиязы, 16 округ, 19 девискээр, 187 участок соңгулда комиссиялары кирип турар, ында бадылаар эргелиг 1526 комиссия кежигүннери бар.
ТМГ Медээлер.
Буян ООРЖАКТЫҢ тырттырган чуруктары.
«Шын» №11 2025 чылдың март 27
