Бүрүткеп эгелээн
Аныяктарның хөй-ниити амыдыралында кончуг улуг хемчээлдиг болуушкун – Аныяктарның бүгү делегей фестивалынга Россиядан болгаш даштыкы чурттардан киржикчилерниң бүрүткели эгелээн.
Делегейниң чоннарының аныяктарының аразынга эп-найыралды быжыглаар, кады ажылдажылганы хөгжүдер сорулгалыг Аныяктарның бүгү делегей фестивалы Россия Федерациязының Президентизи Владимир Путинниң Чарлыы ёзугаар 2024 чылдың март айның 1 – 7 хүннеринде болуп эртер. “Сириус” федералдыг девискээрге эгелээр фестиваль байлак болгаш солун программалыг. Фестиваль регионнарга 2024 чылдың март айның 10 – 17 хүннеринде уламчылаар, ол үеде даштыкы чурттардан киржип келген аныяктар Россияның 30 хоорайларынга баар. Аныяктарның бүгү делегей фестивалынга Россиядан болгаш даштыкы чурттардан 20 муң оолдар, уруглар киржир, олар шупту аныяктар шимчээшкиннериниң баштыңнары.
2024 чылда Россия бүгү делегейниң аныяктарының бажыңы апаар деп Аныяктар херектериниң талазы-биле федералдыг агентилелдиң удуртукчузу Ксения Разуваева демдеглээн.
“Аныяктарның бүгү делегей фестивалының сорулгаларының бирээзи – бүгү бөмбүрзекте сагыш-сеткили човангыр аныяктарның аразынга харылзааны быжыглаар платформаны тургузары. Бот-боттарынга болгаш аңгы-аңгы чурттарның, чоннарның чаагай чаңчылдарынга болгаш культуразынга хүндүткелдиг чорук кол чүүл боор Фестивальдың шөлү 2024 чылда келир үеде чөптүг делегейниң төвү апаар. Делегейни хөгжүдеринче, чоннарның аразында эп-найыралдыг харылзааларже болгаш чурттар аразында чөптүг кады ажылдажылгаже чүткүлдүг шупту кижилерге Россия ажык” — деп Росаныяктарның удуртукчузу чугаалаан.
Аныяктарның бүгү делегей фестивалынга бизнестиң, массалыг информация чепсектериниң, эртем-билигниң, чурттар аразында харылзааларның, культураның, волонтёржу болгаш ачы-буян шимчээшкиннериниң, спорттуң, амыдырал-чуртталганың янзы-бүрү адырларының баштаңчылары, оларның аразында даштыкы чурттарның аныяктары киржир. 14 – 17 харлыг элээди оолдар, уруглар келир чылда фестивальга киржир аргалыг боору фестивальчы шимчээшкинниң төөгүзүнде эң-не баштайгы онзагай таварылга, Россиядан – 500, даштыкы чурттардан – 500 элээдилер Аныяктарның бүгү делегей фестивалынга киржир. Фестивальды организастаарынга болгаш эрттиреринге Россияның шупту регионнарындан 5 муң волонтёрлар киржир, оларның аразында ЛНР, ДНР, Запорож болгаш Херсон областарның 250 чурттакчызы бар.
Фестивальдың киржикчилерин бүрүткээри-биле чергелештир Фестивальдың программазынга киирип болур саналдарны Россияның болгаш даштыкы күрүнелерниң чурттакчыларындан “Программный директор ВФМ” деп орус болгаш англи ийи дылдыг чат-бот дамчыштыр хүлээп ап турар. Ооң ачызында кижи бүрүзү Фестивальдың программазынга саналын киирип, Фестивальдың авторларының бирээзи апарып болур.
18 - 35 назы-харлыг кижилер, ол ышкаш 14 – 17 харлыг элээди оолдар, уруглар Фестивальга киржириниң чагыын ВФМ-2024 https://fest2024.kom/ албан ёзузунуң сайтызын дамчыштыр киирип болур. Россияның аныяктарының бүрүткели ноябрь 4-ке чедир уламчылаар.
Фестивальга каттыш – төөгүнүң киржикчизи бол!