Тываның Баштыңының грантыларынга чагыглар хүлээлдези эгелээнин Владислав Ховалыг бодунуң блогунда бижээн. Бөгүнде 500 ажыг саарылга чок организациялар албан ёзузу-биле бүрүткеткен. Хамааты ниитилелди сайзырадырының талазы-биле төлевилелди боттандырып турар саарылга чок организацияларны деткиир аргаларның бирээзи – Президентиниң грантылары, а ол ышкаш Тываның Баштының грантылары.
– Ол болза, саарылга чок организацияларның хамааты ниитилелди сайзырадырынче, күрүне биле ниитиледиң аразында чугаалажылганы быжыглаарынче, а ол ышкаш бистиң республиканың амыдыралының шынарын экижидеринче угланган эгелээшкиннерни деткиир, шаңнап-мактаар арга-шинээвис-тир – деп, грантылар мөөрейинге чагыглар хүлээлдези эгелээнин чарлап тура, Тываның Баштыңы бижээн. 2023 чылда Тываның Баштыңының грантыларынга мөөрейге 43 чагыгны киириштирген, 20 төлевилел тиилекчи болган.
Бии-Хем кожуундан Наталья Ондарның удуртканы “Буянныг кежиктиң оруу” төлевилел эрткен чылгы тиилекчилерниң бирээзи. «Ромашка» деп ТШО-нуң киржикчилериниң өг-бүлелерин деткиир төптү грант деткип, бистиң чаңгыс чер чурттугларывыска дузаны волонтёрлар көргүзүп эгелээн. Шак ынчалдыр, ук төп тускай шериг операциязының киржикчилериниң ажы-төлүнүң хостуг үезин организастап, дайынчыларның өг-бүлелери-биле психологтуг тренингтерни эрттирип, арыг агаарга идепкейлиг дыштанылганы суртаалдап, девискээрлерниң аштап-арыглаашкынын база өске-даа ажыктыг ажылдарны чорудуп турар.
Бо чылын грант дузаламчызының хемчээли 12 сая рубль болур. Ону Президент грантыларының болгаш республика бюджединден акшаландырар.
Мөөрейниң төлевилелдерин дараазында угланыышкыннарга хүлээп алыр:
- хамаатыларның социал хандырылгазы, социал деткимчези болгаш камгалалы;
- хамаатыларның кадыкшылының камгалалы, амыдыралдың кадык овур-хевирин суртаалдаары;
- өг-бүлени, ада-иени, уруг-чашты деткиири;
- аныяктар төлевилелдерин деткиири;
- кижиниң болгаш хамаатының, ооң иштинде херектээннерниң эрге-ажыктарының камгалалы;
- долгандыр турар хүрээлелдиң база дириг амытаннарның камгалалы;
- омак-сөөктер аразында болгаш чүдүлгелер аразында чөпшээрежилгени быжыглаары;
- хамааты ниитилел черлериниң сайзыралы;
- культура болгаш уран чүүл адырында төлевилелдерни деткиири.
Саарылга чок организациялардан чагыгларны апрель 30-ден «тыва.гранты.рф» платформага электроннуг хевирге хүлээп эгелээр. Мөөрейге киржилге дугайында айтырыглар тургустунуп келгенде база чагыглар долдурулгазынга методиктиг дуза хереглээнде, Тываның Националдар херектериниң талазы-биле агентилелге барып болур. Ооң адрези: Кызыл, Калинин кудумчузу, б. 1 «б», өрээл 300, азы +7 (39422)6-00-62 телефонче долгаар.
«Шын» №25 2024 чылдың апрель 3
