Чылдың-на Россияда апрель 20-ниң хүнүнде чаңчыл ёзугаар каяа-даа, кандыг-даа үеде өскелерниң чуртталгазын камгалаар дээш, боттарының ханын өргүп чоруур буянныг кижилер - Донорларның хүнүн демдеглеп эрттирип турар. Россияда чылдың-на барык чартык миллион кижи, азы өскээр чугаалаарга хүнде-ле 4 муң кижи, ханны хереглеп турар.
Донорлардан алган ханны нарын кезиишкиннер, херээжен кижи чиигеп турар үеде берге таварылгаларда, озал-ондак, өрт, хай-халап, терактылар соонда, онкологтуг аарыглар эмнеп турар үеде дээш оон-даа өске таварылгаларда ажыглап турар. Донор кижиниң чаңгыс катап дужааган 450 мл ханы мырыңай 3 кижиниң амы-тынын камгалап болур.
Чамдык улус бодун долгандыр таныыры азы чоок кижизи донор боорга, чамдыктары кажан-на бир бодунуң чоок кижизинге хан херек апарганда база оон-даа ыңай хөй-ле чылдагааннар-биле донорлап турар. Кол-ла чүүл – эң-не үнелиг бодунуң бир кезиин, кым-бир кижиниң амы-тынын камгалазын дээш, ханын берип турары.
Херек кырында донор болуру ындыг-ла амыр эвес. Донор кижиниң чүгле организми кадык болур эвес, а сагыш-сеткил талазы-биле бодунуң ханын өргүүрүнге белен болур ужурлуг. Россияда чурттакчы чоннуң 2 хире хуузу ханын доктаамал дужаап турар.
Апрель 20 – Национал донорлар хүнү
20 апреля 2023
28