Апрель — чаартылга, шимчээшкин болгаш бирги өңгүр өңнер айы. Ыржым кыштың соонда, бодуйста бүгү чүүлдер оттуп эгелээр: бүрүлер частып, хүн херелдери чылыдып, өскерлиишкиннер болурун оштап эгелээр.
Ады “aperire” деп латынь сөстен укталган, очулдурарга, “ажыдар” дээн. Ынакшылдың болгаш чараш чоруктуң бурганы Афродитаның адындан укталган деп өске тайылбыр база бар. Апрельдиң бир дугаар хүнүн Афродитага тураскаадып, байырлаар турган. Европейжи аттарның улуг кезии латынь дылдан укталган боор. Польшага бо айны “kwiecien” деп адаар, очулдурарга, “чечектелир” дээн, а Чехияга — “дуб” деп сөстен “duben” дээр.
Апрель – частың ийи дугаар айы. Март айны «чырыктың чазы» дээр болза, апрельди – «сугнуң чазы», а бөдүүн чоннуу-биле — «суг саарар ай».
Бурунгу Руська чараш болгаш өткүт кылдыр — «цветень» (чечектелир) дээр. Чүге дизе бо айда бирги ногаа тыптып, чамдык үнүштер чечектелип эгелээр.
Апрельдиң демдектери
Апрельде хөй чаар болза, мөөгүлүг чай болур.
Диңмирээшкин-кызаңнаашкынныг болур болза, тооруктуң дүжүдү элбек болур.
Үер суглуг апрель, тараа культураларының эки дүжүдүн оштап турар.
Куштар уяларын ыяштар баштарынга бедидир кылырга, каңдаашкынныг чай болур, а чавыс болза, чаъстыг болгаш диңмирээшкинниг чай манаттынып турар.
Байырлалдар болгаш төөгүлүг хүннер
Апрель 1 – Бүгү-делегейниң каткы-хөг хүнү.
Апрель 3 – Делегейниң геологтар байырлалы.
Апрель 4-те РФ-тиң истелге органнарының ажылдакчылары профессионал байырлалын демдеглеп турар.
Апрель 12 – Бүгү-делегейниң авиация болгаш космонавтика хүнү.
Ол ышкаш бо айда православ байырлалдар хөй, чижээ, Арыг четверг, Өндүр пятница база Христостуң катап дирилген хүнү — Пасха.
Апрельде төрүттүнген сураглыг кижилер:
Орус композитор Сергей Рахманинов, орус чогаалчы Николай Гоголь, француз чогаалчы, публицист Эмиль Золя, дат чогаалчы Ханс Кристиан Андерсен, российжи шериг эмчизи, хирург Николай Склифосовский, российжи политик, күрүне ажылдакчызы Виктор Черномырдин, түрк-моол полководчу, делегейде сураглыг бир эжелекчи Тимур Тамерлан, шүлүкчү, очулдурукчу Белла Ахмадулина, орус чогаалчы, драматург Александр Островский, итали чурукчу, скульптор, архитектор, эртемден база чогаадыкчы Леонардо да Винчи, цирк артизи Владимир Дуров, англи болгаш америк кино артизи, режиссёр, сценарист, композитор, продюсер, үш катап «Оскар» алыкчызы Чарли Чаплин, ССРЭ-ниң улустуң артизи Георгий Вицин, нацистиг Германияның фюрери Адольф Гитлер, совет политик болгаш күрүне ажылдакчызы Владимир Ленин, российжи политик Владимир Жириновский.
Чурукту интенеттен алган.
“Шын” №13 2025 чылдың апрель 10