Тываның Баштыңы Владислав Ховалыг Чөөн-Сибирь округтуң арбитраж судунуң даргазы Светлана Антонова болгаш Тыва Республиканың арбитраж судунуң даргазы Владимир Ажы олар-биле ажыл-херекчи ужуражыышкынны эрттирген.
Арбитраж судтарының даргаларының Чөвүлелиниң Тывага эртип турган чөвүлел хуралының айтырыгларын болгаш судтарның аразынга кады ажылдажылга дугайында ийи тала чугаалашкан.
Чөөн-Сибирь округтуң составынга хамааржыр 10 арбитраж судунуң даргаларының Чөвүлел хуралы июль 10– 12 хүннерде Кызылга болуп турган. Чуртта тургустунуп кээр байдалдарның аайы-биле хоойлү-дүрүмнер база дүрген өскерлип турар үеде Тывага болган чөвүлел хуралга чугаалашкан айтырыгларны сайгарып көөрү арбитраж судтарының ажыл-херээнге чугула дээрзин Светлана Антонова чугулалап демдеглээн.
Чөөн-Сибирь округтуң арбитраж судтарының даргаларының Чөвүлел хуралын Тывага эрттирер шиитпирни хүлээп алганы дээш Светлана Антоновага республиканың удуртукчузу өөрүп четтиргенин илередип, ук хурал тус черниң арбитраж судьяларынга практиктиг ужур-дузалыг болурун чугаалаан.
«Тыва Арат Республиканың ССРЭ-ге каттышканының 80 чылын демдеглеп эрттирип, 2024 чылда Чөөн-Сибирь округтуң арбитраж судтарының даргаларының Чөвүлел хуралын Тывага эрттиргени бир янзы болуушкун» – деп, Владислав Ховалыг интернетте бодунуң арынынга бижээн.
Ш. ЛОПСАН белеткээн.
Чурукту интернет четкизинден алган.
"Шын" №52 2024 чылдың июль 13
